http://nextplus.nextmedia.com/news/spot/20160901/423317青年新政以「香港民族，前途自決」為參選綱領，香港人可有條件成為一個民族？游（青年新政游蕙禎）：香港人本身就係一個民族。香港嘅地緣係深圳河以南，再包埋香港島，有一個行之有效嘅政府，雖然呢個政府暫時都係由中國政府操控。我哋有獨特嘅歷史，中國其他地方未必好似香港咁，有百幾年嘅英國殖民地統治，再加上政治、經濟共同體，經濟上獨特國際地位，都係民族構成嘅條件嚟。

狄（新思維狄志遠）：香港比較混雜，有中西文化、有唔同省市嘅人，唔同文化結合埋一齊，成為一個多元民族、文化嘅地區。中國係我哋嘅國家，我認同中國人身份，不過我係喺中國香港裡面嘅香港人，我首要關心嘅，係香港嘅繁榮同生活模式得到最大保證。做好一國兩制係最好，確保中國人喺香港群體裡面嘅生活。

游：如果中國同香港出現利益衝突嘅時候，你企喺邊一邊？

狄：香港。

游：所以香港民族其實係講緊取捨。

狄：但我想強調，中港關係未必係對抗、對立，我認為共通點多啲

游：但你冇辦法去排除有衝突。

狄：有，於是我哋喺衝突裡面，先做好共通嘅地方，一齊成長 好似今日嘅局面咁，中央好受咩？

壹：點說服支持者「我係中國人，亦都係香港人，同時以香港利益優先」？

狄：你係黃大仙區嘅人，你喺屋企，梗係維護屋企人嘅利益。你係香港人，我（立場）企喺黃大仙，我梗係爭取黃大仙唔好起焚化爐啦。但黃大仙人同你屋企人，未必永遠都係衝突，起好條馬路、搞好鐵路、衞生，大家都有着數 溝通唔係冇底線，我嘅底線就係維護香港人最大利益。

壹：香港人最大利益係咩？

狄：好簡單，維持兩制、生活繼續發展、經濟向前行、教育做得好，最重要高度自治、有自己嘅政府、管理有效，要做到，就要有民主制度。有一人一票，利益就較容易兼顧。

游：黃大仙人同你屋企人係對等關係，大家會互相協調、去傾。一四年香港人都好願意同中國政府溝通，但係中國政府嘅態度係咩？閂埋門唔理你，（政改）落閘，咁仲點去傾？

狄：泛民同中央從來冇傾過喎。 我記得佢哋喺上海開會，佢哋各自表述、做政治騷 有啲人喺街派單張，有啲人示威、遞嘢俾官員，做政治姿態咋嘛。

（九龍西其他參選名單包括：吳文遠、何志光、毛孟靜、梁美芬、譚國僑、朱韶洪、黃毓民、黃碧雲、林依麗、蔣麗芸、關新偉、劉小麗、李泳漢。）