熱血公民不時攻擊大陸人嚟香港搶資源，但有曾經支持熱普城嘅「苦主」同記者講，熱血首領黃洋達曾經開過一間speed dating公司「美滿人生」，撮合中港情侶。

公司註冊處資料顯示，「美滿人生」○七年七月成立，黃洋達係股東兼董事，一○年十一月已解散，但○九年公司負責人接受《蘋果》訪問時，講明中港婚姻大跌三分一，會定期舉辦中港交友派對。交友就冇乜所謂，但如果根據熱普城嘅講法，容乜易變咗大陸人嚟搶香港嘅筍盤？

究竟黃洋達係咪為咗做生意而不顧香港毒男宅女嘅福祉，引「蝗」入室？佢向本刊「澄清」呢間唔係經營中港婚姻嘅公司，只係做約會服務，但冇透露點解要結業，仲話之前佢喺網台節目都講過約會服務，唔係咩新嘢嚟喎。

神通廣大嘅高登仔引述節目內容，話黃大罵無綫節目《盛女愛作戰》嘅人生導師Winnie自己嘅人生都有問題，有乜資格檢討人哋嘅人生，仲話節目係植入式廣告。唔知開公司做中港約會但唔包生仔嘅黃洋達，又做唔做到其他人嘅人生導師？

http://hk.apple.nextmedia.com/nextplus/時事要聞/article/20160831/2_423159_0/撮合中港情緣-黃洋達認開交友公司