獨派同修憲派如果有對立同衝突嘅話，原因只係支持獨立嘅人睇唔透修憲即係獨立。陳雲要參選，只能講反對港獨，唔能夠講支持港獨。陳雲精明，而共產黨亦心領神會。

講得白一啲：修憲係低成本港獨。共產黨嘅篩選安排，其實係篩走高成本港獨，保留低成本港獨。點解要咁安排呢？因為成本越高，參加嘅人越少，成功機會越低。共產黨比任何一個香港人都想港獨，佢哋有以千億計資產靠香港獨立而保存，佢哋想港獨想到晚晚發開口夢呀，只係香港人唔知咋。香港人，有食有住就得，邊個想拋頭顱灑熱血去搞港獨吖？如果香港人原本就好想港獨，中聯辦同梁振英就唔使做咁多嘢啦﹗

篩走高成本港獨，至少有兩個功用：
一、激起民憤，令港獨情緒更高漲，為本土派拉票；
二、將高成本港獨嘅票谷去低成本港獨嗰度，中共驚死你哋唔夠票，直情同本土派配埋票。

原本個算盤就咁打，不過梁天琦唔知點解走咗去支持青年新政。原本佢應該好大機會將啲票過畀五區公投永續基本法，因為啲支持者立場極其相近，甚至可以話係同一班人。呢個係小意外，我諗背後班master mind都估佢唔到。由於青年新政係意外，所以我估佢哋唔係共產黨嘅人，但亦由於佢哋至今立場曖昧，更加唔似青年間自發嘅政治團體。我大膽估佢哋係泛民整出嚟distract本土派支持者嘅鬼影。如果係咁，佢哋就成功擄走梁天琦，唔多唔少達到票嘅目的。

為咗港獨可以順利而低成本開展，請支持香港獨立嘅各位投熱普城一票﹗