立法會新界西選區候選人周永勤突然退選，講到明擔心家人受傷害，差在唔講邊個陣營對佢威迫利誘，差在未報警求助。呢單嘢一出，最驚嗰班唔係泛民、唔係熱普城、唔係獨派本土派，係香港嘅商家。

先理解一下自由黨係乜東東。自由黨前身係啟聯資源中心，創黨主席係李鵬飛，喺九十年代初為工商界喺政壇擔當代理人角色。當年自由黨好疊馬，唐英年、周梁淑儀、夏佳理、丁午壽等議員，個個都喺業界有江湖地位。當年商家擔心民主派帶來福利主義，影響香港營商環境，都未講到政治上親中與否嘅問題。

紅色商家如譚惠珠、王紹爾等當年亦有成立自民聯，但聲勢及議席數目都不如自由黨,政權移交後併入新成立嘅港進聯，繼續同港英時期藍血親英嘅自由黨分庭抗禮。

自由黨喺 2003 年做咗一件事足以名留青史。當時董建華政府力推基本法 23 條立法，觸發幾十萬市民上街遊行。自由黨時任主席田北俊辭去行政會議成員並要求政府押後 23 條立法，令時任保安局局長嘅「掃把頭」葉劉淑儀問責下台。

呢單嘢，令自由黨喺市民心目中加分，但亦肯定有人耿耿於懷。 2008 年自由黨喺立法會選舉失利，成員林健鋒、梁君彥等退黨另組經濟動力，即現時嘅經民聯。無他，香港商家喺經濟越嚟越倚賴大陸嘅情況下，被統戰、收編嘅個案越來越多。識時務而背棄港英餘孽兼且喺 2003 年跣政府一鑊嘅自由黨，係政治正確嘅做法。

至於 2012 年特首選舉，曾蔭權時代官拜政務司司長嘅唐英年，被紅到仆街嘅梁政英滑鐵盧。同曾經係自由黨成員有冇關係？未必嘅、未必嘅。

嚟到 2016 年，田北俊退居二線為李梓敬抬轎，自由黨地區勢力已經萎縮到連一席都未必保得住，至於周永勤，其實從來冇人覺得佢有絲毫勝算。 Now 引述政壇消息指，負責統籌保皇黨選戰嘅中聯辦今屆力推新民黨同三位西環契仔契女謝偉俊、梁美芬及何君堯，而周永勤選戰矛頭屢次直指何君堯。邊個係方丈？大家心中有數。

何君堯能言善道，喺電視節目《跟著矛盾去旅行》將周庭收服到七個一皮，糖衣包裝不比泛民劉小麗遜色。佢好勇鬥狠、死不認錯嘅性格同梁振英相似，入到立法會威力更勝王國興。周永勤選前一星期自我引爆，究竟對何君堯有咩影響？照計係冇，畢竟泛民名單太多，難敵中聯辦精密配票。

香港經濟經歷過英退港進，而家輪到港退中進。李嘉誠喺嘅長和系近年轉移重心至歐洲，又喺記招拋出「黃台之瓜，何堪再摘」一句，開口牌都打埋，印證香港商家接近無路可退嘅困境。如今自由黨被迫讓路，訊息更加清楚：順我者昌。唔驚就假。
#2016立法會立此存照








https://www.facebook.com/shuklaiview/posts/707004109455060