http://nextplus.nextmedia.com/news/spot/20160824/420952


本土派或港獨派主張民族自決，甚至革命，究竟應該先有民族後有革命，還是倒轉？

恆︰當民主回歸再唔係一個感召到人出嚟去支持嘅論述，究竟要轉移向邊一度？個運動大家係要有目標，要香港人決定，某程度上係團結番成個香港民族。

毛︰呢個唔係民族公投，佢唔需要證明係一個民族，佢只要有一個憲制。民族好虛無飄渺，話係就係 我睇過晒佢哋（青年新政）啲文章，你話香港自古（開埠）已自成一格，其實係冇，英治之下邊度有？

恆︰當日可能係冇民主，但大家會覺得我哋係有自由、有法治，香港呢個地方係可以實踐理想。

毛︰當然唔係啦。講條（箝制自由的）法例，依家都仲有，你做一樣嘢係引起其他地方政府不滿，就可以censor你，電影唔俾放映，《皇天后土》（一九八○年台灣電影，描述大陸文革時的荒謬）咪係囉。如果你講憲制基礎，《英皇制誥》同《皇室訓令》係令到總督擁有絕大權力。

恆︰但大家記得九十年代初，有好多電影暗諷中共，包括周星馳電影，《國產凌凌漆》就係。

毛︰你係講緊憲制問題

恆︰我引用吳靄儀嘅講法，唔係單純憲法問題，係政治問題。

毛︰政治問題，佢（港英殖民地政府）鎮壓兩次暴動，一九五六年鎮壓國民黨暴動，一九六七年鎮壓共產黨暴動，咁你可能話佢鎮壓得啱。喂，關佢鬼事呀？我哋嗰時邊有得講㗎香港人？你同我講話佢哋尊重香港島民嘅選擇？最少佢唔尊重國民黨島民嘅選擇 問題就係當香港由清廷割讓，佢成為一個城市，城市係有印記。你記住，我唔係攻擊你，而係你要討論香港民族係有歷史定位，你要處理歷史素材嘅問題。好似梁天琦咁講，當專制已經成為現實時，革命就係義務，使乜講埋民族。

恆︰我諗成個民族運動，或者獨立運動又好，萌芽階段囉。我都同意喺論述上、學術上係要花幾年時間，點解青年新政話要五年之後，都係話呢幾年大家用時間去做好論述工作，去入屋，去話俾大家聽呢個世界或香港依家發生緊咩事。

有網民揶揄舊泛民抗爭路線成效不彰，亦有人認為本土或港獨派口講勇武，七一當晚青政同本民前號召在中聯辦外集會，結果未開始就散水。究竟香港人要怎樣的抗爭？

恆︰七一係令人失望。我冇數到有幾多差佬同公安，但真係好可怕。有個年輕人好眉好貌，你會唔會expect俾人check咗六次袋？咁我哋仲點搞？

毛︰我必須講個例子，就係殖民地統治嘅可惡。我一九七九年四月五日搞過一次遊行集會，去到新華社門口，俾佢警告係非法集會。我哋四月廿二日搞多個，再申請，佢唔批，剝奪我喎，我咪照去囉，去到都係幾百人圍住，未集會就拉我，話我四月五日非法集會，我坐監一個月嗰次就係咁嚟。

壹︰你覺得香港已經進步咗？

恆︰我哋慢慢退步返去毛哥七九年嗰個位。

毛︰所以佢哋話要自決同獨立咪有道理囉。食過好嘅嘢，你俾啲曳嘢佢。港英之所以放權，係八九民運衝番嚟。

恆︰事後檢討，本土民主前線去號召群眾就有咁嘅結果，二千人（警察）圍中聯辦。我哋慢慢微調運動走向，民族黨搞個和平集會，成個添馬公園都叫坐滿。

毛︰（香港民族黨召集人）陳浩天策略成功，佢事先宣揚咗和理非。

恆︰我哋（七一）都叫和理非，但唔知點解冇人信我哋，唔批（不反對通知書）俾我哋。至於傳統抗爭手法，我哋永遠都係針對嗰種教條主義。泛民做法係你唔和理非，我會同你對抗埋一份。當你阻住其他人做其他嘢，佢哋唔滿意你就好合理。

壹︰幾時勇武、幾時和理非？

恆︰其實好多嘢都由所謂和理非集會開始。但如果你已經佔領過，爭真普選，你再返番去遞信，認為呢個行動係解決到問題，咁就唔合理。

毛︰我覺得咁係年輕人太冇生活經驗，罷工輸咗唔通去自殺咩？你都要返工。

恆︰我哋都唔係下下喊打喊殺，做肖有懷嗰個三非兒童，我哋都係搞遊行；網絡廿三條，都係圍住立法會搞集會。