本土意識抬頭，689政府急急審查宣揚港獨理念人士，剝奪多人立法會參選資格，估唔到連保安公司都有樣學樣，對一位著住「叫我香港人」Tee嘅訪客諸多留難，差唔多當佢恐怖分子看待。

話說兩星期前，鄧先生去沙田銀禧花園探朋友，佢對本刊憶述，當晚同兩個朋友先透過對講機通知朋友，之後按照程序同座頭保安登記，卻突然聽到保安要求同事增援：「需要搵人嚟幫手，要求增援，快啲增援……佢著住件印有『香港』兩個字嘅衫，又繑埋手，唔知佢哋想做乜。」

鄧先生即場質問保安解點T恤寫上「叫我香港人」就被當作可疑人物，但保安未能解釋，更強行押送一行人到探訪嘅單位，佢質疑：「我哋無犯事，但點解要押送我哋？」佢批評保安態度惡劣，多番要求之下先肯寫低姓名，但字跡潦草。

攞住保安員姓名，鄧先生向長江旗下嘅高衞保安公司投訴，但對方嘅回覆相當行貨，只係話基於保安理由，任何訪客到訪單位前如未能完成保安登記，為保障業戶安全，公司會安排保安員陪同訪客至有關單位確認身份。高衞又聲稱無就訪客服飾設特別指引。鄧先生批評高衞刻意避談政治：「如管理公司真係如保安員所講，係有公司指引嘅話，咁我覺得呢個絕對係政治審查。」

撰文：羅霈潁，張馨文
攝錄：鄒潔珊，梁譽東



http://hk.apple.nextmedia.com/nextmag/art/20160804/19721702