兩個人之間嘅關係可以好虛無，但兩個組織之間嘅關係絕對係有跡可尋。本民前同青政雖然抗爭手法不同，但理念同樣以民族論為基礎。呢兩個組織由成立至今一直有大大小小嘅合作，大家上網塭返唔難，我諗我應該講d唔多人知嘅事實，俾大家知，俾大家了解更多。

新界東補選，喺2月28日係所有本土派組織大團結，全力幫天琦助選。但其實喺魚蛋革命前，只有青年新政係默默咁支持嗰時毒撚無人理嘅梁天琦。本民前當時無選舉經驗，唔少行政同文件上嘅野都會問有區選經驗嘅青年新政。

一月下旬，天琦宣布參選後，我地幾個人，包括梁頌恆，企喺本民前office個露台度傾黎緊嘅選舉策略，同埋brainstorm用咩口號。「光復香港、時代革命」呢句口號就係嗰晚天琦諗出黎嘅。

喺年初一前兩三日，選舉通郵已經印好哂，嗰時除左本民前嘅成員，只有小量嘅義工同支持者幫手貼label，而青年新政亦有成員黎幫手。當時佢地亦預備借出黃埔嘅辦事處同人手俾本民前作工場之用，不過最後為咗方便處理，都係集中喺本民前office度做。

喺魚蛋革命之後，本民前大部分成員因事件被捕，組織士氣非常低落、以致行政幾近停頓。補選後期嘅宣傳品同文宣，大部分都係喺青年新政嘅設計以及文宣團隊嘅協助下完成。

喺二月二十八日補選投票日，青政亦總動員出動，承包將軍澳街站全力為梁天琦助選。

以上係幾個月前新東補選發生嘅事。

而今日同梁頌恆合組名單嘅李東昇，對大眾黎講係新名字。佢係天琦中學同學，係佢介紹天琦俾黃台仰識同拉佢入本民前。佢係梁天琦同黃台仰非常信任嘅朋友同戰友。如果要講本民前第三人，應該就係佢。佢亦都因魚蛋革命被落案起訴。如今佢退出本民前，同志同道合一樣咁熱愛基本法嘅梁頌恆合組名單出選新界東。

都係嗰句，唔係要大家盲目相信同支持，只係想講更加多大家未知嘅事實，俾大家了解更多，可以客觀分析後再作主觀判斷。

利申：本人並非本民前及青年新政成員。喺新界東補選時擔任梁天琦選舉代理人。將於是次立法會選舉擔任梁頌恒名單選舉代理人。

P.S.見高拜，見低踩，在我看來係人之常情。所以喺患難中雪中送炭嘅朋友，係份外珍貴同值得珍惜。








https://www.facebook.com/photo.php?fbid=10153575759826876&set=a.454667391875.245059.507701875&type=3&theater;