梁振英喺2014年曾經講過，體育對經濟冇貢獻，咁體育嘅新聞重唔重要呢？對無綫嚟講應該就唔係好重要喇。

今日凌晨，前無綫嘅體育新聞主播姚雋彥就喺facebook貼咗一張晚間新聞嘅黑白相，仲話：「二缺一，很心噏。再不想見到的畫面，始終也要出現。抱歉沒能力把關至最後，讓區區分半鐘的你悄悄地被消失。不在其位，不謀其政。然而『曼聯又輸一場』，以後恐怕未必會再出現，心很痛。R.I.P. 20160716」講到好似有人過咗身咁，但「分半鐘」應該就唔係講緊人，而係講緊體育新聞。





再睇另一個前無綫嘅體育組同事馮堅成，都喺facebook話：「體育新聞先是幾年前，在六點半新聞被消失，幾年後，又輪到周六及周日的晚間新聞被滅，作為一個前員工，仍然感憤怒，怎麼分半鐘都不能生存?!真是唔講粗口都唔得×@#×#@#×」





睇番噚晚（周六）嘅晚間新聞，體育新聞呢個一個環節就已經唔存在喇。其實早就有傳無綫嘅體育組同事走得嘅走，剩底一兩個人，所以o依家連短短分半嘅體育新聞都冇埋，好可能體育組已經一個人都冇。

http://hk.apple.nextmedia.com/enews/realtime/20160717/55371514


【深宵煲劇潮=亞視】連播《使徒行者》《皆大歡喜》 無綫突削新聞時段 晚晚谷舊劇

上回講到，大台前體育主播馮堅成為咗大台cut新聞時間，嬲到喺自己個facebook度爆粗（新聞連結： http://bit.ly/29GVmA2 ）而大台「偷」咗啲時間去播《使徒行者》同《皆大歡喜》，前者就應該係用嚟谷即將上映嘅電影版；後者，應該係用嚟吸廣告……



睇到呢度，大家除咗心痛體育新聞又被cut，以及（被逼）睇「釘姐」佘詩曼同「爆Seed」林峯嘅演技之外，都會諗吓，大台咁做有冇違反廣播條例？


睇番大台嘅節目表，以今年3月1日（周二）嘅節目表為例，《六點半新聞》播25分鐘、《晚間新聞》播45分鐘（周一至周五）；同年2月27日（周六）嘅《六點半新聞》同樣播25分鐘，《晚間新聞》則播20分鐘。以前周一至周五，大台會播3節新聞，最尾一節有時會播啲專題類報道，不過o依家，已成歷史。






呢個禮拜嘅節目表（7月11日至7月17日），《六點半新聞》播放時間同長度不變(即25分鐘)，但周一至周五晚嘅《晚間新聞》，就突然由45分鐘cut剩25分鐘；至於周六至周日嘅《晚間新聞》，就由以往嘅20分鐘cut到得番15分鐘。



之前有追開《人在邊緣》嘅觀眾一定記得，套劇係凌晨12時15分先播，《晚間新聞》係播到11點55分，緊接就播天氣、《娛樂頭條》同宣傳易。以「用家」身份嚟睇就係：如果你趕到返屋企，洗埋頭沖埋涼剛剛好，o依家就趕唔到喇。但趕唔到《使徒行者》頭輪，仲有個「Hey ar Hey ar Hey!ar Hey ar Hey!」嘅《皆大歡喜》凌晨1點等緊你。





家陣無綫整個「煲劇潮」，下午播完《護花危情》，同日(即翌晨)3點35分又播一次，晚上又重播《使徒行者》同《皆大歡喜》；而J5就重播「學警系列」，無限loop舊劇，因為大家都知，舊不如新，舊劇仲多觀眾捧場，廣告都會多啲。而另一個可能就係為播奧運舖路，留住啲客咁樣樣。呢條橋，萬試萬靈。


但做到咁，咪成個亞視咁囉！

http://hk.apple.nextmedia.com/enews/realtime/20160717/55371880