隔牆有耳：超人兩握鬍鬚曾　
CY拍馬追唔上


【一握財爺】■誠哥主動以兩手握鬍鬚曾，財爺1︰0領先。何家達攝




立法會主席曾鈺成爆料話中央唔會欽點下任特首，即係話特首梁振英想連任，就要接受挑戰！咁啱梁振英、政務司司長林鄭月娥同財政司司長曾俊華呢三位疑似落場人選，噚日一齊出席香港潮屬社團總會就職禮，原本三人同台已經好睇，點知同場仲加插一場「超人兩握鬍鬚曾」，真係好睇過戲！


【CY反攻】■CY採取攻勢，搵超人握手，扳平1︰1。

習握手後再勝一仗
話說CY、林鄭、鬍鬚曾同屬主禮嘉賓，不過待遇明顯有別。CY同中聯辦主任張曉明，分別負責致辭同頒就職證書，但大會今年整咗個特別環節，叫做頒獎狀，畀林鄭負責，咁林鄭就算冇機會講吓嘢，都叫有啲嘢做吓，同樣有上台嘅鬍鬚曾就齋坐，到啟動儀式時又同十幾人一齊主禮，基本上可有可無。到活動完咗，佢都快人一步自己去咗搭?，而CY就同張曉明同行，林鄭隨後。


【再握財爺】■超人落台前再搵鬍鬚曾握多次，鬍鬚曾2︰1勝出！

不過鬍鬚曾做路人甲都好，有樣嘢CY拍馬都追唔上嘅。話說李嘉誠一上台就搵鬍鬚曾握手，仲係熱情地兩隻手握，咁CY呢？到儀式完結後，CY主動去搵超人握手，超人禮貌地同佢握一握，明顯同鬍鬚曾唔同。

場戲未完，超人握完CY，臨落台前一記回馬槍，再搵鬍鬚曾握多次，結果鬍鬚曾以2︰1完勝！至於林鄭似乎就相當黯然，起碼八方見唔到超人同佢握手。之前鬍鬚曾已有「習握手」，唔知睇完呢一幕，3名疑似下任特首嘅行情又會唔會唔同咗呢？

李八方
[email protected]

http://hk.apple.nextmedia.com/news/art/20160708/19686507