嗱！唔好話我賣花讚花香，如果你有個HR女友唔該你好好箍實佢。經過我多年嘅觀察，佢地絕對係筍貨娶得過！

1/ 吹水無難度
做HR經常要對住唔同Candidate做Interview，有一定嘅說話技巧，乜嘢Topic都識講下。你絕對唔使擔心佢同你巴打、屋企人無話題，因為平時吹水就係佢工作一部分，上至Superman下至Running man，都可以同你傾一餐，唔使驚無話題。

2/ 女神級細心
HR出嘅文件都係Official文件，份份都代表緊公司。打少咗個逗號？死得。大階打咗細階？死得。無隔行？死得。打錯人工？死十次都唔掂！Payroll夾唔到數？死咗都叫返醒你！無限復活之後勁過不死人，細心到唔使你講都知你隻高達轉咗Pose。

3/ 專一過宋慧喬
佢地嘅工作環境都係以女人為主，加上HR呢個部門「生人勿近」嘅形象，真係想偷食都難。而且日日都對住堆女人，返到屋企見到男人呢啲稀有生物，一定唔使講咀啖先。所以佢地對你一定專一，就算見到仲基Oppa都絕不變心，忠誠度極高。

4/ 成熟有主見
HR經常要做決定，請唔請個Candidate都有一定話事權，所以做HR嘅女人一定要有主見。做唔到決定請唔到人實畀啲腦細斬死。作為佢地嘅男朋友，唔使擔心經常出現呢啲對話：

「今晚食咩好？」
「打邊爐？」
「我怕熱氣呀！」
「食壽司？」
「我嚟緊Period，唔想食生冷嘢。」
「咁你話事啦…」
「我無所謂，你諗啦！」

NONONO！依個情況唔會發生喺佢地身上，佢地會諗好想食咩，畀埋意見你。

5/ 毒L變男神
HR界基本上都係陰盛陽衰，咁多個女人走埋一齊除咗喺Pantry講下呀姐是非，仲有咩做？梗係要Show off下自己背後嘅男人啦。我喺Office就聽過好多次身邊嘅女同事講自己老公有幾靚仔有幾體貼，講到佢一呼一吸都好似有仙氣噴出嚟咁。明明係毒L都畀佢講到變男神，聽到男人都想嫁畀佢老公。

仲唔考慮下你身邊嘅HR女同事？好嘢嚟架！

原文刊於HR小薯蓉Fb專頁，獲授權轉載。

http://cthr.ctgoodjobs.hk/article/show_article.aspx/1189-16980-做hr女仔娶得過?utm_source=gen-topic-20160618-01-a-16980&utm_medium=enewsletter&utm_campaign=ct

——————————
個作者其實幾一廂情願