千億新抱徐子淇(Cathy)舊年10月誕下孻仔李建熹，連同之前兩個女一個仔，啱啱好湊夠兩個「好」字。

做咗媽咪後，子淇除咗要忙住照顧小朋友，當然都要抽時間陪吓老公。今日有讀者趙先生透過本報「爆相爆片」，分享子淇同老公李家誠喺上個禮拜六，與過萬人齊集林蔭大道(The Mall)，一齊欣賞英女皇伊利沙伯二世，慶祝官方嘅90歲大壽慶典。
趙先生喺電話中透露：「嗰朝大約10點幾，啱啱英女皇架馬車駛到去我哋前面對出，佢哋(Cathy同老公李家誠)就企喺我側邊。見到巡遊隊伍嗰陣，佢哋都好興奮喺度自拍，雖然當日好多人逼喺廣場，不過附近都企滿外國人，所以好易認得佢哋！」
喺讀者分享嘅照片中，着住粗線橫間衫加牛仔褲，一身casual look嘅子淇，俾老公攬實腰一臉笑意，當巡遊隊伍行到面前時，子淇仲舉起V字手勢同老公自拍，甜到漏！不過子淇身後嘅男子嘅表情就好似嬲豬咁，相映成趣。
另一樣嘢就係……即係咁，平時徐子淇每次出埠，都會喺ig打卡。但係今次去英國見英女皇，子淇竟然冇打卡，係咪忙得滯唔記得咗？
咁惟有等下啦




http://hk.apple.nextmedia.com/enews/realtime/20160614/55226739