當奴接受訪問時稱，他稱完全不知為何俾人打，又指主要是頭部受傷，縫了兩針，脫了骹，有少少碎骨。當奴的版本與Jacky相同，又稱之前聽同事提過謂有個報稱是的士司機的瘋狂fans，而今次事件中施襲者又是從的士車尾廂取出棒狀物體襲擊其頭部，行兇後駕的士離開，故未知是否就是該名司機fans。當奴自言商台同事有見過該名fans，大概應知「發生咩事」，但他就完全茫無頭緒。他自言見Jacky被打時十分害怕，以為點錯相，後衝出去見到對方駕的士，故懷疑就是同事所指的瘋狂fans


凌晨1時35分左右，仍留院的當奴步出走廊接受訪問，衣領有血跡，包著頭，戴上口罩，神情平靜。


當奴今早出院，被問遇襲關唔關「商業嘅嘢」，對於好拍檔少爺占爆佢受傷有另一啲原因，當奴有啲勞氣咁解釋：「嗰個乜鬼嘢商業原因，黐線㗎佢，叫佢去死，當然唔關事，我諗佢講嘅係唔啦更，唔使理佢，唔使理佢!我鬧爆少爺占先。」


佢更好大反應咁話知道少爺占講做呢行都冇得擔心：「有啲咩商業原因，咩商業原因，冇咩商業原因，我哋知道個源頭係邊度。」


此外，有傳早前佢同前商台DJ雲海絕交，今次佢遇襲，有唔少網民聯想起雲海，而雲海亦都喺facebook留言慰問，當奴都話有睇到呢個留言：「當然唔關啦!唉!我知呀!我好多謝佢，多謝佢，總之最簡單嘅版本就係有一個比較瘋狂嘅聽眾，就係咁，唔關咩商業糾紛事，冇咩商業糾紛事，唔好信呢啲嘢你哋，死仔少爺占。」



講到個fans之前有冇騷擾過佢，當奴稱：「冇!就係冇我份，被騷擾嗰位唔係我，我只係聽聞過，咁我哋叫被(瘋狂聽眾)騷擾到嗰班同事小心啲，點知自己今次就『瀨嘢』喇!」
咁對方打你嗰陣有冇講過咩原因?當奴坦言：「冇呀!使咩原因，(任何嘢都冇講)冇呀，咩都冇講，(你認得佢)，冇，我都唔識佢嘅，(但你又知佢係騷擾同事嗰位聽眾)見到佢揸的士，因為知個狂迷係揸的士，就係咁，唔好信嗰啲，求吓你哋啦!」臨講bye-bye之前，當奴再次補多句罵少爺占：「死仔亂噏嘢!」


一直有在醫院陪伴當奴的商台DJ梁文禮，下午透露當奴經縫針及打石膏後，經已返到屋企。對於當奴今次遇襲，梁文禮表示對兇徒已心中有數，「我哋已鎖定一個人，一個團體，終於佢都郁手喇，警察可以做嘢囉，之前已經備咗案一次。」


梁文禮（圖左）指襲擊當奴（中）的兇徒，瘋狂痴戀麻利






被問到事件來龍去脈，梁文禮指與DJ女同事麻利被的士哥瘋狂痴戀有關。「我當時拍麻利，離開公司門口出去，架車（瘋狂粉絲）真係喺出面等㗎，家陣佢終於傷咗人。」至於兇徒今次的行兇動機，梁文禮則不敢猜測，只說兇徒約5呎6吋高，「我哋知道邊個啦，車牌我哋都知，上過嚟幾次等」。


DJ Colin是事件中的傷者之一


據悉，在今次事件中受傷的DJ Colin，曾替麻利出頭，勸喻該名狂迷不要再接近麻利，疑有人懷恨在心，乘Colin與當奴等同事到茶餐廳用膳之際，襲擊Colin，而當奴則不幸捲入事件受傷。


Colin今早出院後即返商台開工，佢接受電話訪問表示認出呢位麻利瘋狂fans，與噚晚向佢襲擊者係同一人：「大約幾個月至半年前左右，佢喺麻利fb同ig留言，初時佢都係留正常嘢，麻利都有答佢，之後佢嚟商台問口等麻利，又送花入商台，因為比一般fans熱情，麻利開始驚佢，噚晚就發生呢件事。」


問到佢之前係咪見過呢位狂迷？Colin話：「之前喺商台門口見過佢，因為佢對麻利造成困擾，麻利曾報警備案，嗰次佢喺電台死都唔走，我哋離開唔到電台，麻利就報警，之後我哋擺市集，佢都有出現，但冇做過特別嘢。」

Colin話噚晚喺商台出發去食飯：「懷疑佢跟我哋去九龍城，當時麻利唔在場。因為我哋坐最出面，佢打我先，之後順手打埋Jacky，我諗佢想示下馬威，佢打完即走，當奴最快反應追出去。」問到狂迷打人前有冇同佢哋講乜嘢？Colin話：「一句說話都冇講，但我認到佢係同一個人。」點解針對你哋？佢話：「唔清楚，唔可以用正常人思路。」


Colin話唔可以斷定狂迷乜事，但覺得佢同正常人有分別：「佢大約20幾歲，頭髮中間分界，矇豬眼，最怪異地方唔係個樣，而佢一般嘅瘋狂fans，唔會令偶像憎你，但佢明知麻利避佢都死纏難打，正常人唔會咁做，之前我哋反追蹤佢ig搵線索，原來麻利po文之後，發現佢去同一地方影相，麻利覺得好恐怖。」


問到之前有冇同狂迷傾過偈？Colin話：「冇傾過，佢駕夜間的士，我哋幾個返夜間，猜測咁中招。」平日同麻利一齊惹佢誤會？Colin話：「平時放工有食飯，佢知有人跟蹤，佢會搵同事陪佢走。」

http://hk.apple.nextmedia.com/realtime/breaking/20160614/55225496