劉家豪、梅小青及馬浚偉今日出席電影首映接受訪問，講及有關大台開新劇嘅事。係啦，劇，就係新嘅，但題材就……又玩續集囉。





劉家豪同梅小青早喺今年4月回巢無綫，正式成為製作部總監，主理戲劇合拍片。身居要職自然掌要務，梅小青話遲啲會開新劇叫《深宮計》，會搵番自己嘅愛將馬浚偉今拍，馬仔就話自己係自由身，同邊個電視台都有合作機會。

咁家豪哥呢，佢就話落實開拍《溏心風暴3》，仲度緊劇本，有40集，預計明年過咗農曆年就開工。


卡士方面，大家都關注有冇阿邊個啦，邊個同邊個。答案如下:
1.基本上都係原有班底，因為家豪哥表示「演員方面大部份都得」
2.男女主角係夏雨同李司棋，雖然佢哋已經離開咗無綫，但家豪哥話佢哋已經確定會參與。
3.鍾嘉欣要生BB，法拉就要讀書，所以兩女確定不會參演。
4.咁程亮／管家仔——林峯呢？家豪哥提都冇提過佢。似乎大台仲未嬲完林峯當日決定唔續約喎…


《蘋果》打俾林峯，阿峯就話無綫冇搵佢參與《溏心3》，林峯答咗一個字：「冇。」
林峯又話，佢已經接咗套大陸劇，工作排到出年年中。換言之，同《溏心3》開拍時間重疊咗啦，咁應該真係唔會拍喇。

http://hk.apple.nextmedia.com/enews/realtime/20160613/55219345