大台年中搞唔少慈善節目，經常邀請不同團體表演，酬金未必有，但總有少少車馬費嘅。



嚟緊25號，無綫將舉行「明愛」慈善籌款活動。今日凌晨，被喻為「90後凝聚弦樂新勢力」嘅香港樂團The Strings Amarta，喺fb share咗一個po，係一段WhatsApp對話截圖。內容大意係，無綫本月25日舉行明愛慈善籌款活動，想請提琴家喺現場為一位明星伴奏，需要5個小提琴同3個大提琴手，故邀請The Strings Amarta參與演出。



WhatsApp對話雙方，一方係The Strings Amarta，另一方就係提出邀請者，po文未有介紹是否中間人定係無綫，只從對話中見到，中間人/無綫向The Strings Amarta提出邀請時，表明係無經費，仲特別強調埋，另外嗰一個120人嘅樂團都係免費嘅！



The Strings Amarta將呢段WhatsApp對話放上網之餘，並寫道:「TVB 話係慈善表演所以冇經費，問題唔係錢，係尊嚴的問題。如果識得尊重我哋，就會明白我哋學習音樂係付出咗好多時間同心機，係香港選擇音樂做職業要有好大勇氣。堅持自己相信嘅價值。玩好音樂。」


對於慈善騷冇budget請人，無綫企業傳訊部宣傳科副總監曾醒明今日回覆傳媒話：「以我所了解，今次答允應邀表演嘅係『新聲國樂團』，佢哋係義務演出，但我哋當晚都會提供交通、膳食同樂器運輸俾佢哋。」


曾醒明續稱：「為咗配合製作演出要求，加強弦樂陣容，所以新聲國樂團嘅統籌許先生，就話會搵外援，希望可以做到中西合璧，咁佢哋係點溝通，我哋就唔清楚。」


「其實以往TVB亦試過邀請青年中樂團同青年交響樂團呢啲團體嚟演出，而佢哋都係抱住為善最樂嘅心，義務客串做表演嘉賓。」


至於有網民質疑無綫搞慈善騷，自己都有收取製作費，對此，曾醒明坦言有收明愛嘅製作費，佢回應話：「TVB以往同6大慈善團體合作，好似仁愛堂等，始終台前幕後都需要成本去製作，所以每一個慈善團體，我哋都有酌情收番佢哋成本製作費。」
http://hk.apple.nextmedia.com/enews/realtime/20160613/55222170

無綫慈善騷冇酬勞 樂團：唔係錢，係尊嚴問題

又係「45 like同share」嘅翻版，大家仲記唔記得幾日前，歌手狄易達爆粗講句「你當我onX」。

冇錯，又係借慈善用途，同你講『俾機會你做宣傳』、『可以喺咁大嘅場地表演wooo』、『做多啲慈善嘢幫你學校儲多啲ref』等等。


呢啲「機會論」聽落好似好有point，不過骨子裡，就話俾你知，收錢做騷係唔合常理嘅，最好諗都唔好諗！



咁今次又係邊個想食free lunch呢？話說啱啱喺facebook有人share咗一個po，內容係話無綫喺今個月25日舉行「明愛慈善籌款活動」，想請提琴家喺現場為一位明星伴奏，需要5個小提琴同3個大提琴手。文章引述TVB一方或中介人士聲稱當晚仲爭4個小提琴手同2個大提琴手，之但係講明無經費，仲特別強調埋，另外嗰一個120人嘅樂團都係免費嘅！


而文章引述答覆嘅人(相信係樂團負責人)都講明冇經費有啲難度，但會盡量安排！以上內容說明咗啲乜？即係話有人想喺有限資源做無限嘅嘢，定係中介人搵呢隊樂團嘅決定，不過請人表演，吓吓話做慈善而冇budget，咁係咪就代表尊重呢位或者呢班表演者呢？！


http://hk.apple.nextmedia.com/enews/realtime/20160613/55219956