何韻詩又再「被捲入」政治風波，無啦啦被一國際護膚品牌發聲明指佢唔係代言人，究竟咩事咁嚴重呢?




是咁的，最近「發市」嘅何韻詩，除咗成為一個嗽口水代言人之外，仲會有一個音樂活動，就係同該化妝品牌合作，喺一間Cafe獻唱，2號佢好興奮喺fb宣佈:「做咗一陣失業人士、飾演完旅人、OL、村菇、廢鐵嘅多重角色之後，今次終於有人搵我回歸我最原始嘅角色，歌～～～～女～～～！！！！」



咁阿詩其實從來冇話自己做咗呢間公司嘅代言人嘅，純粹只係一個crossover活動，之但係強國人就有好強烈反應，喺該品牌嘅微博瘋狂留言話要抵制呢個牌子，然後，該品牌今日喺fb同微博都發出聲明話:「中國香港地區藝人何韻詩不是品牌代言人，由此對消費者造成的誤解我們深表歉意。」FB版本多咗句:「活動邀請藝人何韻詩小姐的原意為純音樂上分享，並無牽涉任何代言人合作關係。」



出完個咁嘅聲明，就輪到好多香港人不滿，紛紛留言:「請HOCC有咩問題？我都一個用家，產品得唔得我諗最重要既唔係代言人，會返轉頭買既是因為覺得好用，唔係你既代言人有幾靚」、「原來hocc唔係代言人咁唔洗買你d product啦」、「可以幫你宣傳俾身邊所有女性聽以後完全唔需要考慮呢個品牌，因為呢個品牌只關心自家利益而唔係消費者嘅用戶體驗。咁你搞咩活動都係多餘，成個公關部門可以摺埋。」、「咁你就咪鬼請啦，又要威又要戴頭盔，一個國際brand做到你咁小家。」



而去返強國嗰邊呢，出咗聲明班強國憤青落咗啖氣未呢?答案係未嘅，仲拉埋藏獨嚟講喎:「蘭蔻屬於歐萊雅，旗下還有大家最不齒，公開支持藏獨的企業Body shop，頂上去，讓大家看到，堅決抵制。」、「歐萊雅集團還真是劣跡斑斑，剛剛才發現之前貴司的科顏氏（Kiehl’s）就已經涉及藏獨問題，居然屢教不改，現在還請這個港獨做推廣，現在才知道怕知道玩文字遊戲？事實上你們請她做推廣是無可爭議的事實，想以一個不是代言人來蒙混，你們把從大陸消費者口袋裏賺的錢送給一個港獨藏獨分子做推廣支持他們？」






睇返呢個品牌，罕有地喺fb嘅follower數大幅拋離微博，fb有成7百幾萬個follow，微博就只得80幾萬，應該就本來好好地係想香港導向，再去大陸發展嘅，不過遇上國情唔同，o依家搞到兩面不是人，真係又一個關公災難，究竟會點收科呢?

http://hk.apple.nextmedia.com/enews/realtime/20160605/55188300