我知單人監倉一定大過以下房間一倍以上

http://hk.apple.nextmedia.com/realtime/magazine/20160531/55165952



香港人喺住屋方面真係好艱難。不過，原來住夠位擺放睡床同衣櫃嘅劏房已經唔算慘。因為，《壹》仔喺某個租屋網站，竟然發現咗一間「終極監倉劏房」，只夠位放一張梳化床，隔離就係馬桶。

根據網站資料，呢間「監倉劏房」位於油麻地華德大廈B座11樓。建築面積150呎，實用有100呎，月租2500蚊，加220蚊管理費。於是，《壹》仔就扮租客約經紀睇房。
女經紀與《壹》仔喺油麻地港鐵站會合後，佢就帶《壹》仔行去華德大廈，「居住環境可以的，但講來講去房間就是細一點 ，你接受得到就可以。有窗的，有兩個窗。」女經紀不斷落咀頭讚好。
上到去，女經紀就大力拍門。之後，有個女人開門，原來係女經紀嘅鄉里，正喺「監倉劏房」內休息。女經紀即吩咐女鄉里把梳化床收起來，「其實把沙發床收起後，空間頗好用的，只是二千多元，已經算很好了，樣樣設備也齊全，(沙發也會給租客？)給租客用的。」有咩設備呢？「冷氣、熱水爐和窗，這邊有一個窗，這是內窗，那邊是外窗。」
房間真係好細，好懷疑實用面積有無100呎。只夠位擺一張梳化床，要朝行晚拆。梳化床隔離，就係馬桶同沖涼嘅地方，即係要瞓喺馬桶隔離，好慘啫。最搞笑係，個馬桶係BB size，會唔會坐爆㗎？
之後，女經紀話約咗人趕住走，叫《壹》仔慢慢睇，「兩個月按金加一個月租金，如滿意就找我簽約。我現在走，你先看一看，再見。」
香港竟然有呢種「監倉劏房」，真係基層哀歌。
採訪：程志康
攝影：韋平