原告姚垂廣十六年前涉嫌喺旺角活力卡拉 OK非禮兩名女子，到北九龍裁判法院應訊，最終因證人口供矛盾脫罪。《蘋果日報》圖片

夜場收費歧視案　原告未拍過拖
男蒲友嫌夜場男女收費不同，透過平機會控告夜場性別歧視勝訴，引起社會熱議。四十四歲嘅原告人姚垂廣係高級警員，十六年前涉及旺角卡拉 OK非禮案但脫罪。佢似乎蒲咗好多年，各界都好奇點解佢「咁多事」。


姚太對本刊表示，佢個仔唔係「爛蒲」之人，但擔心佢因為呢單案「被人伏」。（莫智謙攝）

原告母親同本刊講，阿仔細個嘅志願係做警察，佢係孝順仔一名，好肯幫朋友，老豆喺佢十幾歲因胃癌去世。雖然好仔，但咁多年冇帶過女朋友見阿媽，感情生活相信係零。姚太力撐阿仔本性善良正義、追求公平，今次係小事一樁。

不過，姚太都唔明阿仔點解告人，「人哋係咁㗎嘛收費，你嚟就嚟，唔嚟就算，我都叫佢唔好理。」作為人母，佢驚阿仔在明，人哋在暗，卡拉 OK行業咩人都有，擔心阿仔被人伏、被人打，「唔係話警察唔驚，警察有後眼呀？」

業界企硬　夾錢撐被告翻案

自由黨青年團主席李梓敬（右三）對裁決感憤怒，上星期到蘭桂坊收集簽名表達不滿。（李梓敬 facebook圖片）

另一邊廂，酒吧業協會副主席錢雋永事後收到敗訴嘅夜場老闆求助，估計原告入場後發現「啲女唔夠多」先投訴。依家未知老闆會唔會申請推翻缺席裁決，但業界好齊心，有人提出夾錢撐被告。佢同十幾個酒吧老闆聯絡過，一致企硬唔改收費，以不變應萬變。

自由黨青年團主席李梓敬上星期去蘭桂坊收集簽名，表達對裁決不滿，話短短一個鐘已有大約二百名男女簽名，本星期一帶同簽名到平機會請願。

撰文：巫不言

[email protected]


來源 source: http://hk.next.nextmedia.com

+++++++++++++++++++++++++++++++++++++++++++++++++++++++++++++++++
原來 on9 仔一名