中學訓練營 嚴苛手法惹爭議

http://ubeat.com.cuhk.edu.hk/中學訓練營-嚴苛手法惹爭議/

講緊呢個營，中學讀保記應該有去過
-----------------------------------------------------

Fb有人貼解毒方法：

https://m.facebook.com/story.php?story_fbid=1241400892537980&id=100000042425417

去camp前梗係俾大家睇吓啲精神糧食，認清被巧妙包裝嘅真相。查實呢個撚屌營同極權政府做嘅嘢差不多

七大手段：

1）要求學生「不要問只要信」，教練就係真理，真理就要服從。打住「我為你好」嘅旗號就可以命令你做一切不合理嘅事情。跪老師，幫教練按摩，錫地下，企落缸污糟水到等等（懲罰程度會按照學校要求調整，舊年最盡都係做下掌上壓咁）

解藥：呢種方法同極權政府或者邪教冇分別，教練會將好多似是而非嘅事扭曲成「事實」，再將責任推落學生身上、甚至藉機進行「國民教育」。例如：大學排名下跌係年輕人懶惰造成，但事實係排名計算方法由多種不同因素計算，不只於大學生成績。所以教練講嘅嘢未思考清楚前切忌當真。
而且唔係一句「我為你好」就等於可以對你進行羞辱、體罰等等。訓練當然可以接受，但各位要量力而為，認為自己做唔到唔需要勉強自己，唔係人人都係運動員或者被虐狂。要記得「成功」呢把尺係佢哋定嘅，遊戲規則都係佢哋定出嚟，做唔到唔等於自己廢柴。

2）將群眾壓力包裝為團體精神，捱苦全班捱，受罰全班罰，一位同學對教練要求不達標，全班以連坐法處理。

解藥：教練好巧妙地製造出一種虛偽嘅團結。三日兩夜嘅訓練將同學由最低層次嘅「團結」推向更高層次。低層次係指大家搏老命做task、互相合作只因不願受罰和累街坊。而慢慢地當所有事情都一齊受苦，一齊搏殺，最後取得成功後，大家就以為和其他同學好團結。不排除有一班死黨係真團結的，但成班團結嘅真正原因只係最初嘅怕累街坊，而唔係最後嘅大成功。同紅衛兵一樣，最後只會令到學生互相批鬥、破壞關係、損害同學自尊。學校就係社會嘅縮影，要記住社會上一樣有好多不同嘅人，「道不同不相為謀」，不用「為團結而團結」，假團結、勉強冇幸福。

3）「煽情音樂治療」與「語言暴力」手法，以「一啖砂糖一啖屎」嘅方法將你尊嚴當成爛泥，再俾少少甜頭你。製造假感動，令你講出一啲自己都不能相信嘅說話，再將你講過嘅說話當成承諾。

解藥：經過整日令同學叫苦連天嘅體能訓練、人生攻擊，此時你嘅老師會出現，而大台會開始播放煽情音樂，伴隨教練溫柔嘅聲音勸你反思自己，並且要如何改進。（呢個過程會出現喺每個task之後嘅檢討環節，將你要狂搵自己缺點嘅過程潛移默化，務求音樂治療時你哋就可以對自己班主任跪地求饒）此時，再堅強嘅男兒漢一旦中計亦會喊到成督屎咁，但只係因為訓練與治療之間嘅巨大反差令你心情大起大跌。查實，冇咗前面hardcore的部分，到咗柔情環節你亦唔會喊到成隻shit咁道歉。（人當然係要反思自己啦，但呢種被逼反思係唔會令你真心信服）

4）製造「假失敗」、「假挫折」，最後嚟個大團圓結局，令你誤以為自己係經過千辛萬苦嘅嘗試才邁向成功。

解藥：教練只係跟住一份劇本嚟做。例如：去年最後一個爬高牆任務，第一次做佢會話你唔成功，第二次做嘅時候如果你展示到比第一次更有鬥志，你就成功咗。（可能係你第一次佢點都會話你唔成功，或第二次佢點都話你成功）稍為用邏輯推理一下，經過第一次長達十五分鐘嘅體力勞動，第二次係冇可能比第一次出更多力，所以第二次係冇可能快過第一次。之後一班教練就會對你講「事實證明只要你努力就可以做到！」之類嘅廢話。正如上面咁講，做唔到唔一定係自己問題，坦言面對失敗亦係一種學習，毋須同佢浪費時間精神。

5）培養對自己班嘅「象徵物」－班旗。呢數日喺任何比賽上你都會同呢支班旗一齊吶喊助威、流汗流淚，從而形成心理上對呢支旗嘅感情。當你哋失敗嘅時候，佢會攞你支班旗出嚟話要剪爛佢，同學就會開始痛哭崩潰要求教練唔好咁做。

解藥：班旗只係一件死物，人就係生嘅。班旗毀滅代表你哋班會散？會從此不和陸？唔係囉。佢要脅你剪班旗，不用阻止。

6）鼓吹虛偽擦鞋風氣。鬥快讚教練靚仔英明有分加，分部分餸菜比教練有分加，幫教練揼骨有分加。

解藥：喇所以話呢個camp係訓練奴才，培養奴性思想。你幫佢擦鞋唔係因為你真心想幫佢，係因為你為咗今晚可以加長你沖涼時間或明日訓練冇咁金。事實上，你一班人幫佢刷鞋，你會累其他班減少權利。但當大家都唔擦鞋，就大家嘅權利都唔會減少。

7）要求各位不停大聲高叫，無論是打招呼、做task等等都要大聲，否則會被人話「不投入」。

解藥：打氣的確可鼓勵士氣，但過份嘅大聲同亂叫亂跳就係多餘行為，好多人甚至叫到聲沙，喉嚨痛足一星期。其實訓練重點係大家合力完成目標，你喺一邊亂鳩咁叫實在於事無補。以適當嘅方式鼓勵同學即可。

以上解藥應該夠架喇，萬一佢有咩新玩法，切記要批判性思考、多角度分析，唔好令自己失去理智。

更多實例：

動作優柔寡斷會被轟「成個垃圾女人咁。」（性別定型，性別歧視）

將所有你做過嘅錯事講成「人渣所為。」（偷呃拐騙可以係人渣，殺人犯都可以係人渣，咁你欠交功課上堂訓教又係人渣？）

任務中途腰斬，然後問你哋做錯啲咩，對答一輪後佢會話你知係「點解後面啲人唔同啲同學打氣？」「叫得唔夠大聲」（正常人都未必估到佢覺得你有咩做得唔啱，甚至其實你根本冇做錯到。因為教練總會雞蛋裡挑骨頭，冇嘢搵嘢嚟鬧。即使你哋係做得最好最快嘅一群都可以俾人鬧）

罰「冇熱水浴」（呢種罰法暫時我都諗唔到點破解，覺得辛苦咪唔好沖涼囉。不過放心，飯佢一定比你食，基本人權嚟）

使用武力威脅，輕則推撞掌嘴，重則舉刀脅持。（放心啦，佢打你你傷一時，佢受一世。法律會制裁班人。唔好還拖，你一定唔夠佢打。）

萬能原則：

1）思考思考思考！！！

2）真。團結就是力量！！！

3）緊記做人尊嚴！！！

4）勇於承認失敗！！！

5）切忌使用武力！！！

歡迎討論或補上其他論點

最後祝大家玩得開心：）

最最後，呼籲十七大勿做奴性教育幫兇，請你哋喺營入面講多啲正常嘅鼓勵說話，勿附和教練，相信會對比較膽小嘅班別有好大嘅鼓舞。

最最最後，我好相信睇完呢個post嘅大家只要保持清醒，當呢個營嘅作用對所有學生都無效嘅時候，佢就會自動毀滅！