香港警察真係捉蟲，違法倒泥頭唔去管，反而百幾人全副武裝走去拉示威者，最氣頂係，警察今次保護嘅係新界有名惡霸，有屯門江湖惡人之稱嘅忽得超，搞到整個屯門老新仔耀武揚威，話警察都要幫佢哋做看更，警黑合作再添一例。



忽得超個花名點解叫忽得，你懂的，佢一向惡慣，屯門反黑組有佢成呎厚file。嗰日記者問佢幾時開始喺嘉湖山丘倒泥頭，條友即時殺氣騰騰兇記者：「倒乜泥頭呀？你講咩呀喂！」問吓啫，唔使咁惡呀，但佢對住無綫新聞嘅鏡頭又即刻另一個樣，一臉委屈話班人為選舉先來示威。

屯門向來是老新仔世界，亦都有各路江湖猛人，其中忽得超以前跟屯門新義安猛人「側頭送」行得好埋，其後「側頭送」2005年在荷蘭被槍殺後，有人開始接收佢嘅地盤，包括藍地唔少生意。近年忽得超更成立工程公司，積極在屯門及元朗收地建村屋發展，廣結屯門和元朗鄉紳，唔少街坊都怕咗佢。有錢自然多搞作，忽得超同鄉紳做生意，學人收地起村屋，呢幾年賺到盆滿鉢滿。而忽得超份人一向都好活躍，凡係江湖中人擺酒，佢都必定到場。好似上年新義安總管林江擺壽宴，忽得超就同藍地老新話事人肥傑一齊到賀，2014年嗰陣，仲同14K元朗揸fit人四眼細、屯門新義安肥傑、跛榮等人聯手出席江湖宴會。



http://nextplus.nextmedia.com/news/spot/20160323/375604