「派嘢」俾街坊真係好大學問，派啲咩、喺邊派、派俾咩人，樣樣都考起區議員。早前將軍澳區議員陸平才應中華煤氣有限公司搞咗個送爐行動，對象訂明係住私樓嘅長者同綜援戶，結果俾插離地。今日（3月10日）到馬鞍山區議員派米，今次一啲都唔離地，不過寫到有啲亂，又要召喚關公咁話。

今次咁溫韾嘅「香米敬老愛心」活動係由民建聯、馬鞍山耀禧選區嘅議員李世榮發起，為表對長者敬意，會向區內「老友記」派米。但網民睇到張宣傳海報後覺得有啲難捉摸。派米對象話就話係「老友記」，不過內文就非常博愛，又有傷健人士喇，又有65歲以上長者？定其實要又傷健又年紀大先有得派？

另外，登記派米要帶同住宅證明，水費單、電費單，仲多咗樣嘢叫煤電單，相信係打錯字，應為煤氣，你黨友係鍾樹根，《壹》仔唔會怪你，不過俾啲眼利網民見到就唔係幾好喇。同時，亦基於有網民對於政黨嘅不信任，有人質疑區議員登記地址嘅用途；亦有人指登記地址只係為免有人魚目混珠。






http://nextplus.nextmedia.com/news/latest/20160310/368012