自從新界東補選過後，媒體依然對落選嘅本土派候選人梁天琦窮追不捨。先揭發佢係煙民（雖然無咩好講，食煙同政治立場有咩關？），而家爆佢唔係香港出世。有啲五毛如獲至寶即刻打蛇隨棍上，話唔怪得梁天琦可以咁高調參選都無事原來係二五仔云云。

出生地同血緣，同身份認同唔係100%直接關係。一個人係咪香港人，唔係睇佢邊度出世，而係佢嚟到香港，願唔願意尊重香港嘅文化、為香港付出、守護同愛惜香港，最重要係有無身為香港人嘅自覺。當香港水深火熱嘅時候，願意留低同其他香港人並肩作戰，你就係香港人。



有啲人成日覺得「本土派＝右翼＝法西斯」，但係其實本土意識係非常大愛包容。陳雲喺著作《身土不二》如此寫道：


中文的「本土」，是指原來的生長之地，也指當地。本是根本，樹木的根叫「本」。根不可無土，土是培養的資源。原本植根該地的，是本土；外來而在該地落地生根，根深葉茂的，也是本土。⋯⋯原生的、移植過來的都屬於本土，只要落地生根，混為一體，在此地發揚光大，當地人引以為榮的，都是本土。《身土不二，180頁》

雖然本土派普遍比人印象係「逢中必反」——反對每日150個單程證額，擔心香港人口會被中国人取代。但事實上，我哋討厭嘅係落嚟香港為咗拎福利又唔回饋香港嘅人，而不幸地往往呢啲人都係中国人居多。我都相信，「中国都有好人」，只要你嚟到香港，落地生根，不論你係邊度出世，都會係香港人嘅一份子。一個人係咪香港人，未必同出生地有關，更加唔一定同種族掛勾。



喺廣州出世嘅張敬軒，唔單止身體力行支撐本地藝術發展，更經常暗地支持香港人嘅抗爭行動，絕對係香港人。

前無線女記者利君雅，你唔望住部電視根本會以為佢係華人。佢土生土長，講得一口流利廣東話，絕對係香港人。

印度裔藝員喬寶寶、英菲混血兒YouTuber Asha、韓國港足隊教練「金仔」金判坤等等等等無數例子，當然都係香港人。

香港就係如此多元，本土意識就係如此包容。



反之，即使係香港出世，亦可以出賣香港，或者對香港漠不關心嘅人何其多。每次選舉後我望住個低到咁嘅投票率就會諗，到底啲人去咗邊？香港嘅沉默大多數好似生活喺另一個平行世界咁，香港嘅事佢哋睇唔到，覺得政治好黑暗所以寧願唔理寧願由得呢個城市沉淪落去。更加可恥嘅係有啲人同情極權政府，認為抗爭者係搞事廢青，唔了解來龍去脈就話對香港好失望好想走。就算呢啲種子係香港種出嚟，佢嘅根已經唔喺扎喺香港嘅泥，一陣風就可以吹走佢哋。

喺香港出世又如何？唔喺香港出世又如何？只要你有香港人嘅自我意識，你，就係香港人。




http://www.vjmedia.com.hk/articles/2016/03/06/128326/愛香港，守護香港，就是香港人/