http://nextplus.nextmedia.com/news/latest/20160306/366018

做區議員不時都要關心吓區居民，搞吓活動，有啲優惠回饋吓社區都不為過，不過喺將軍澳就有區議員喺中產住宅區，贈送明火煮食爐俾區內長者同綜援人士，有網民質疑：「住得天晉，每月管理費差餉地租，已經貴過一個煤氣爐」，係咪真係幫到居民？結果被批「堅離地」。

將軍澳選君區區議員係報稱獨立嘅陸平才，呢2個星期喺辦事處張貼咗「送贈煤氣爐」告示，就中華煤氣有限公司慶祝區議會「聯絡小組成立15周年」，而推出嘅「煤氣愛心爐具暖萬家計劃」，訂明只要係60歲以上長者（獨居或雙老）或綜援家庭，就可以帶同證明文件同煤氣單報名，活動由今年2月25開始至8月31日為止。

聽落都唔錯，之不過，對象係富康花園、君傲灣、天晉一期嘅居民。呢3個屋苑都算係中產住宅。好似富康花園，呎價都上到$6000架、而君傲灣售價都要500萬以上起跳，至於天晉更有唔少過千萬嘅單位。

於是有網民就搲晒頭，指「住得天晉，每月管理費差餉地租，已經貴過一個煤氣爐」、「有錢請工人姐姐無錢買爐？」，除咗富康花園之外，其他兩處單位入伙都包咗有煤氣爐「唔使打孖上呀」。另外亦有網民指圖中嘅爐頭舊式，「呢啲爐仲邊有人用！」，換咗師傅都會叫買個買第二啲咁話喎。

不過亦有網民認為陸平才係盡在區議員責任：「作為一個議員，有福利資訊通知街坊係佢既（嘅）職責。因為佢冇可能知道街坊們是否有申請資格。但萬一佢冇通知街坊而令街坊失去領取機會，佢就會被質疑沒盡區議員既（嘅）責任」，又有人補充，「有d（啲）情況自住物業係可以豁免、可以拎綜援」。

不過就唔係個個網民都接受呢個講法喇：「住得呢3個屋苑又領綜援，議員你知唔知你做緊咩？」、「其實即係唔使送」；又建議佢去毗鄰嘅公屋送爐：「過來尚德邨送啦，送到佢破產」。