自年初一旺角警民衝突及周日（2月28日）立法會新界東補選後，「本土民主前線」及其發言人梁天琦喺香港人心中留下深刻印象，「勇武」、「本土」成為代名詞。不過人紅是非多，早前有網民狠批天琦BB食煙，唔夠pure唔夠true（新聞連結：bit.ly/1RruzGh）；近日又有網民質疑天琦BB唔係香港出世，係「偽本土」。

今日（3月5日）天琦BB去到新界東各區答謝補選中獲6.6萬票支持，去到將軍澳區謝票時，回應近日網民嘅「非本土」質疑，天琦BB承認自己唔係喺香港出生，但強調「唔係代表啲咩，正如我喺電台節目講，不論出生，不論住幾耐，不論係咪香港出世，只要係擁護香港一切價值觀、文化、制度，都係香港人」。

同時，有網民稱梁天琦母親為新移民，天琦BB反問：「嚟香港24年，講廣東話，在港工作，咁都係新移民？」梁天琦並非香港出生，母親喺湖北武漢人，父親係是香港人；天琦BB喺中學時考入元朗區英中名校，再考入香港大學哲學系，現時為港大五年級生，主修哲學，副修政治及公共行政。

有網民留言指唔應該以「血統」定義本土港人：「梁振英夠係香港出世啦，又唔見佢土本」，亦有網民舉出藝人河國榮、印裔社工Jeffrey Andrews等例子證明即使唔係本港出世，都可以「好本土」。

對於中國外交部將旺角衝突形容為「暴亂事件」，指稱由個別本土激進分離組織策動，梁天琦表示對方人在北京，又唔係香港人，無需要理會外交部睇法，「係香港呢個地方，做我認為對香港最有利嘅事」。即使京官解讀有誤、有打壓都唔重要：「打壓愈大，反抗愈大」，「最重要是人民會反抗，會還以顏色」，管治者有責任聆聽人民訴求。

對於《大公報》曾有專欄文章「改口風」讚天琦BB，佢就話唔會理呢啲嘢，當中有何含意都應該問番中共。





http://nextplus.nextmedia.com/news/latest/20160305/365558