正當個個香港歌手都返內地搵食嘅時候，被高登仔喻為香港樂壇「民主女神」嘅謝安琪就用「本土化」呢個concept嚟拍MV。

早前謝安琪被陳淨心舉報，有傳搞到阿Kay喺大陸嘅表演因而取消，睇嚟阿Kay冇被「舉報」嚇怕，噚日佢推出嘅新歌《山林道》MV仲大打「本土化」概念。

MV入面除咗有靚靚嘅阿Kay之外，仲有多位以堅持自己，改變到其他人嘅人物，先後出現新藝城傘店第五代傳人邱耀威、「五個小孩的校長」呂麗紅、喺「佔領運動」中十分活躍嘅攝影師馬丁、九十後音樂人Bonbon、輪椅區議員葉榮、旅居西藏嘅旅行家薯伯伯、海外義診機構全仁中醫創辦人歐卓榮、本地紋身師Jayers、為智障兒童舉辦舞蹈課程嘅舞蹈家王廷琳，個個都係為香港社會、社群，以致自己人生而努力嘅人。

其中邱耀威嘅介紹寫住「回憶和情懷比搵食更重要」同埋薯伯伯「香港永遠都是我的根」絕對係道盡真．香港人嘅心聲。此外，MV嘅結尾仲寫住「毋忘初衷」，似係叫大家唔好忘記本心之外，呢句說話亦都係「雨傘運動」時嘅口號，令每個人都會有自己嘅見解。