這次訪問在最後一場新東補選論壇錄影結束後進行，本土民主前線梁天琦趕回土瓜灣的辦公室附近，相熟茶餐廳已自動為他預留座位，匆匆吃午飯同時談著以武制暴和參選，他邊吐雞骨邊點名怒屌多人，指社民連梁國雄、黃浩銘不看歷史，「去台灣考察咗啲咩返來？唔知佢係咪故意忽略歷史定冇心，如果係有心，佢就係政棍。」



台灣黨外人士又係食人血饅頭？

他表示，意念來自台灣歷史及美國黑人民權運動，尤其台灣美麗島事件後，黨外人士組成民進黨參選立法院。對於有人批評他既然不認同立法會制度，應作街頭抗爭而非參選成為制度一部分，他完全不認同。「我好奇怪，啲社運人士成日去台灣，又唔去睇台灣歷史。我睇到黃浩銘又係講埋啲咁嘅論調，真係低能㗎喎，佢明明啱啱先去完台灣，佢冇睇民進黨點來㗎咩？」

他指即使未能改變議會制度，進入議會後仍有話語權，民眾能聽到他的發言，亦可用議會資源幫助群眾，加上現實是他們沒有槍炮，只能靠群眾力量，並舉例指民進黨首批黨員之一朱高正進入萬年國會，就是為了終止萬年國會；但香港現時的代議士卻只讉責暴力，無法連結或幫助議會外的群眾。

本民前在選舉期間捲入旺角騷亂中，引來梁國雄的人血饅頭論，他說︰「我未屌佢，佢屌我。」批評梁國雄引喻失義，魯迅的《藥》是講群眾不明白革命者的血為何而留，只迷信人血饅頭可以治病，令革命烈士的血被愚昧群眾吸乾。

他無法理解旺角事件與此有何關連，「就算真係有血嘅饅頭，上面都有我哋本民前嘅血。仲要黃浩銘呢啲?即刻出來附和佢，好搞笑，佢會唔會形容美麗島派黨外人士入去參選，係食人血饅頭？」

他強調撐小販是本民前一向的工作，去年冒著被屌成左膠的風險，幫小販擺檔及清潔街道，就小販政策向食環署交建議書，今年小販被迫到後巷時向他們求助，出來幫忙是應有之義。「從來都唔關選唔選舉事，係應唔應該去做，否則同政棍有咩分別？跟住啲茂里又出來屌我哋選舉工程、血饅頭乜乜柒柒，屌，我哋做開嘅嘢嚟㗎。」


話和理非非有用，只係睇到歷史表面

從中瀝事件、美麗島事件、民進黨參政、鄭南榕自焚，以至解嚴、李登耀修憲，他對台灣民主化過程倒背如流，特別欣賞陳菊，當時台灣仍有戒嚴、黨禁，但有班知識份子不顧前途和安危，推行黨外運動，才讓人民看到希望。

他指蔡英文競選總統時，曾引用陳菊在獄中寫的遺書「鼓勵人民爭取維護自己的權利，是行使人類良心的行為，絕不是暴力」，但其實台灣爭取民主過程血淋淋，暴力到不得了，選舉舞弊引發示威，民眾將石頭、汽油彈擲向警方，「憤怒嘅群眾就係咁樣，政府先知道佢哋鎮壓唔到群眾，人民始終多人過當權者。」

他批評和理非非相信能以道德感召爭取民主，是只看到歷史表面，美國黑人平權運動中馬丁‧路德‧金和平演說，背後有麥爾坎‧X暴力抗爭，兩人初時分歧，後來仍互相合作；印度獨立運動中，人們只著眼甘地和平抗爭，但民間發生逾五百次暴動，「英國人唔敢殺甘地，因為佢哋知道殺咗甘地會好大鑊，引發嘅暴動佢哋鎮壓唔到。」故他認為有武力抗爭時，和理非非的談判籌碼亦會增加，是一個客觀事實。



助紂為虐唔係中立，唔係新聞自由

他的「沙石論」引起各方爭議，至今仍堅持己見，相信是大家看事情的格局不同。他指當時旺角是戰場，要不影響無辜是脫離現實，而人們回顧歷史時，是看事件的起因、結果及影響，不會再看旺角當晚有人打警察、記者或燒的士，「你睇法國大革命嘅影響，會唔會睇話，嘩，啲人喺巴士底監獄殺咗啲獄卒喎？」

被問及如何定義新聞自由及採訪權，他只此一句︰「監察政權，報道社會現實。」那示威者打記者、在法院外包圍記者指罵，是否破壞新聞自由？他考慮了一陣子後說︰「我真係唔識答。但我腦海中嘅新聞自由，唔包括影示威者大頭、扯口罩，亦唔包括將示威者供出來，咁係助紂為虐。」

他又質疑有電視台攝影師，在示威者毆打警員時，走上前保護警員的做法，「咁叫中立咩？」記者也是人，人看到有人快被打死時，不是應該相救嗎？「嘩，咁我哋被警方扑到仆街時，又唔見佢大義凜然出來阻開個差佬？」

他始終不忘建國，但選舉宣傳單要使用較含蓄的字眼，惟想不到「自決」這詞仍無法通過選管會關卡。要建國，農業自給自足是一個must，他對現時政府推出的農業發展基金、水耕菜毫無信心，農業園只會變成類似數碼港、科學園的地方，反而應該由民間發展農業。

「宜家民間有好多棄耕地，畀陳茂波啲仚家拎買咗一塊又一塊囤地自肥，或者等發展商收，所以其實民間農業有好大發展空間。政府要做嘅係注資畀民間團體，例如啲鄉土學社，之前睇過佢哋教城鄉共生，我覺得呢啲概念啱。」若能進入議會，他主張政府推出農業輔助金及補貼，令本地菜的價格下降，得以與內地進口菜競爭。


大台咪手好撚煩

午飯後，他便要回去趕功課，大學頭兩年投入棍網球運動，代表港隊出賽，腳傷後兼職賺錢，今年又要處理社運和選舉，這名政治新星正面對能否畢業的危機。這次參選仍未獲家人支持，父親雖從小教他關心時事，但常說「槍打出頭鳥」，又擔心投入政治後難以變回普通人，不過他相信勝出後家人不會再這麼說。

他中五會考後，覺得自己長大了可作決定，騙家人說和同學打球，第一次參加七一遊行，從此成為示威常客。在雨傘運動中認識黃台仰前，他在七一、反東北等活動是普通參與者，當時已對「人做咩我做咩」反感，開始思考該做什麼。但他最記得是大台咪手好撚煩，尤其邵家臻、陳淑莊、陳小萍等人，「重覆講點解我哋要出來、我哋一定要堅持落去，屌我一早知啦，講埋啲我呀媽係女人，七一已經好熱啦。」



成個泛民都好撚憎

起身步出餐廳時，有食客和他握手表示支持，雖然遇到支持者會開心，但他仍未習慣成為鏡頭和人們眼光的焦點，特別怕電視台的大攝影機，每天在街上被途人注視也感不舒服，「琴日同黃台仰行街，好似兩個通輯犯咁，周圍啲人望住哂……」

Facebook的大量拉票帖子和駡戰，他卻沒太留意，「Facebook睇少啲比較好，佢會篩走啲同自己冇咁近嘅人。」網民塑造男神形象，還是自貼性感照，或拿他與貓的合照拉票，他都沒所謂。

有人說性感照是邪招，他反問︰「乜香港人道德水平咁高咩？你係咪唔睇AV？」又否認是借貓過橋，「啲人自己攞我啲私人相來貼。我救咗我隻貓，我政綱提動保政策。如果因為我過去冇投入動保運動，咁我搣咗條政綱又會唔會對世界好啲？」捍衛本土，卻被批評廣東話也說不好，他回應︰「對唔住，我有懶音。會讀多啲，練多啲。」

最欣賞的泛民議員是黃毓民，那最討厭誰？「成個泛民都好撚憎。」他最看不過眼是議員按完反對掣，然後就出來說「今天是最黑暗的一天」。對表明會搶佔主席台的他來說，拉布都未算做夠，「搵條友入去叫點人數，走，有幾咁難？講到自己做咗好多嘢咁，不知所謂。」

他指議員放不下身段和光環，無法阻止議案通過，並非人民力量未夠，而是議員做的未夠，「如果廿尻幾個全部泛民落哂去搶佔主席台，咁會唔會剎停到議會？」



是次新東補選候選人尚有劉志成、黃成智、周浩鼎、梁思豪、方國珊及楊岳橋。





http://www.vjmedia.com.hk/articles/2016/02/27/127684/梁天琦屌爆長毛黃浩銘唔睇歷史，邵家臻陳淑莊大/