香港的陣痛，當群眾用盡所有溫和方法抗爭，每次選舉都含淚投票，結果社會停滯不前。為對抗暴政，總要有人犧牲，他不介意做先頭部隊。



「我俾流彈（磚頭）誤中，成舊磚打落個頭度，我都暈咗陣，嗰刻諗過會唔會冇命、有嚴重後遺症。會唔會好嬲啲人亂咁掟，或掟錯自己友？完全冇。我起返身嗰刻同啲友講，你繼續掟啦，呢啲係好小意思，就算我瓜咗都冇問題。」

這次騷亂來得太急，聽到警察開槍後，他來不及「易容」及戴口罩，就現身示威現場，故他未有在警員面前掟磚，但指罵警員則是「最低消費」，擺明發洩，「我唔覺咁樣係暴力嘅抗爭，呢個純粹係施暴同反抗嘅關係，同爭取普選係一啲關係都冇。你俾人打，你會唔會唔還手？好多人想差佬死，等於好多差佬想我哋死一樣，不過佢出住糧，我哋就自己獻身咁解。」

這個「獻身」的想法，阿博未有事先向家人交代，「有太多顧慮你冇辦法去抗爭。（寧願犧牲咗先？）係呀，諗咁多就冇用。一個最好嘅例子咪（佔中發起人）戴耀廷囉，佢哋三子考慮呢樣，考慮嗰樣，搞到佔中一pat屎。」

他表明泛民要對今次運動付出歷史代價，皆因多年來泛民已由抗爭者變成體制內的既得利益者，並坦言恨不得泛民消失。記者提出採訪邀請時，他亦猶豫本刊立場跟泛民太接近，深怕記者不能原汁原味表達他對泛民的痛恨，「無論做任何嘢，好似都俾貌似係同路人嘅你哋（泛民）譴責收場，我使乜理你哋感受？泛民如果到呢日都唔肯醒，基本上你哋已經自己掘咗墳墓，等收皮啦。」

他更樂見政府、保皇黨以至泛民的積極譴責，否則香港只會繼續溫水煮蛙，「你唔惡化得急劇啲，香港唔會有轉機。你一定要諗辦法將呢盆溫水變成滾水，辣到啲港豬即刻醒，甚至係令到佢哋完全唔敢講嘢。」

一路以來，主流香港人錫身，實未敢為理念犧牲性命，但據阿博的觀察，今次留在現場的示威者已有玉石俱焚的心理準備，「如果連執起嚿磚頭都冇機會，就真係絕望。但執起舊磚頭掟出去，就會有希望。始終要有班義士用身體、性命去搏，然後啲人先可能會選擇番團結，或者醒覺喺一個所謂和平啲嘅道路上。所以呢啲犧牲係絕對有價值而且絕對有必要。




http://nextplus.nextmedia.com/news/latest/20160217/354920