今日感覺上與昨天一樣凍，仲陰天 D 㖭，點解今日又唔停埋課呢？陰功咯，有冇返學學的小貧友，今日凍到送入 QE 或瑪麗急症室？

有好多人留言質問：氣候反常，英國夏天三十度都熱死幾百人，咁佢哋係咪「弱者」？

英國冬天，也照樣凍死幾百人。現在個 Point 係：咁英國夏天反常而熱死好多人的時候，英國小學幼稚園有冇停課？（勿忘記：那邊的課室，從未適應反常熱氣候，係冇冷氣設備的）

反對停課，唔係下令 D 細路著少 D 衫上北極前線去捱凍，凍唔死，先至「達爾文」，而係著多 D 衫仔、著厚 D 襪仔，可以一樣去返學。乜嘢叫冬天？香港唔係冇咗冬天了咩？書本讀咁多，而家咪有得 field trip lor？

一個五六歲的學童，如果穿得夠，在五六度的天氣之下，在一個課室坐一天，會凍到傻，或者會個個入醫院？咁參加東瀛遊去北海道，跟爹哋媽咪同導遊 Ivan 一齊落咗旅遊巴，喺鬼怒川室外賞雪餵熊熊一日的港孩，歷年一定凍死凍病好多件。

但凍親凍傻咗個小貧友，從未聽見話康泰東瀛遊咁多年遭到香港團友父母投訴兼索償喎，又？

當然，死都堅持，我個小寶寶好珍貴，應該受到大愛關懷，冇問題，但辯論要講邏輯。教育的宗旨，除了體驗自然時艱，就係思考要理性。否則，本來係一個香港公民，就會好似「犀牛」荒謬劇一樣，蛻變為一名中國網絡五毛份子。

https://www.facebook.com/tokit.channel