對於被消失被平安事件，今日竟然聽到個朋友同我講：「咁你唔同政府唱反調咪冇事囉，你都係呀！成日喺Facebook亂講嘢話政府，小心俾佢哋滅聲呀，其實正正經經寫下其他嘢咪好囉，上次個三萬蚊港人我都有睇，我都覺得好睇有幫你share架，咁咪雙贏囉，再講丫……」(下刪一千字教誨)

先唔好分佢係咩顏色同邊種動物，因為好似以上嘅說話我都聽過唔少次，根本就係一個綜合思想。七警就話佔領人仕唔聽話、手臂延伸就話適當武力、三跑高鐵超支就話大勢所趨、小學TSA就話教育增值、鉛水事件就話個別事件，連23條都可以覺得係保障知識產權。你可能會覺得佢哋好白痴，但其實有著依種心態嘅香港人起碼超過總人口嘅一半，事實就係我哋其實只屬於少數覺得依個香港係有問題，要去了解去諗辦法解決甚至抗爭嘅異類。

我哋Facebook日日都會見到好多社會事件政策弊端民生問題，亦有大量討論，但千祈唔好以為同道中人有好多，因為只係我哋冇乜點接觸到另一邊個世界，睇唔到聽唔到佢哋另一端嘅諗法同意見。就好似阿叻上次出嚟認屎認屁，我哋就笑鳩佢話佢不知所謂詞不達意，但其實另一個平行時空有好多撐佢話佢講晒佢哋嘅心聲，你同我可能都會覺得佢哋好ON9，但佢哋又何嘗唔覺得我哋討厭？

有邊種人覺得依家個政府甚至白色恐怖係冇問題淨係覺得八九十後搞抗爭嘅人係廢青？大部分都係上一代有幾層樓喺手上咗岸嘅人、靠政府同政黨養住嘅新移民、打緊政府工自我催眠嘅人同大陸有利益輸送嘅商人。依班人其實已經係我哋香港嘅一半有多。

好多人都話對依個香港已經冇期望甚至絕望，我會覺得每個時代都有唔同問題，我會厭倦嗰班和理非非嘅港豬同賣港求榮嘅新香港人，但對香港依然存有希望，個希望就係讀到依度仲未上一頁嘅你。人嘅希望對象永遠都係生命，而唔單單只係一個地方。

-

P.S. 唔好灰！you are not alone 起碼你仲有我，少數族裔應該要更團結。

願祝你同我都唔會被北上被平安。
同屬少數族群嘅于日辰上


https://www.facebook.com/onedayopenfromtheson/photos/a.179440318771634.44886.155880857794247/946245968757728/?type=3&theater;