話說以為自已可將玻璃變鑽石，遲啲出世做到朱克伯格嘅陳百祥，之前喺《我係乜乜乜》入面，狠批學民思潮召集人黃之鋒讀唔成書，令全城嘩然。

噚日佢接受本報訪問時，就繼續回應，澄清叻人唔一定要讀好多書，佢話「李嘉誠讀過書咩？我讀過書咩？依家最叻啲人都係冇讀過書嘅。」

即係咁，李嘉誠的確係冇輝煌學歷，不過唔代表佢冇讀過書！佢多年來關注教育公益，同時不斷讀新科技、新知識的書籍，咁解釋到點解佢投資Startup眼光咁準！要知道李嘉誠2007年投資Facebook時，陳百祥連咩係Facebook都未必知！

李嘉誠曾喺訪問中表示，好鍾意看書，往往係喺書中入夢。後生做打工仔時，同事打麻雀，佢就喺度睇《辭海》，日日如是，睇到本《辭海》殘晒。所以早前有言論質疑佢不愛國，李嘉誠能夠引述古代詩人蘇軾及白居易的作品﹕「此心安處是吾家」以及「我身本無鄉，心安是歸處」，證明佢有一定文學根基。

至今，李嘉誠已獲多間著名學府頒授榮譽博士學位，包括香港大學、中文大學、劍橋大學、加拿大卡加里大學、北京大學等。









http://hk.apple.nextmedia.com/realtime/finance/20151221/54560096