被網民稱為「網絡23條」嘅《2014版權（修訂）條例草案》，今日喺立法會恢復二讀。草案充滿灰色地帶，明顯針對鍾意藉二次創作諷刺時弊嘅網民。雖然草案名義上保護原創同版權持有者嘅利益，不過唔少創作人同藝人，都齊齊反對網絡23條。



林夕今日喺報紙專欄文章話，擔心網絡23條一通過，網上滿佈地雷，網民隨便改歌，都會被政府告到坐監，宣佈唔計較個人網上版稅，歌詞任改，作品任唱，又唔會民事訴訟二次創作嘅網民。

黃偉文亦都喺fb表示，「方丈份人好大方，我啲歌詞隨便改，You have my word!」又話自己之前都試過二次創作，將李克勤嘅《高妹》改成《高妹正傳》，一樣咁受歡迎。

藝人之中，跟得最貼嘅，都算係男神王宗堯同黃耀明。王宗堯上星期已經喺fb呼籲網民聯署，反對網絡23條，呢排又不時share各類二次創作。至於黃耀明，就share過網絡23條嘅懶人包同分析文章，今日亦都share過夕爺嘅文。

歐錦棠喺fb話，網絡23條一通過，大台冇得照抄照搬，就冇本地特色、外國原創嘅節目劇集，影響呢個香港唯一大台嘅節目質素。

雖然今日立法會人數不足流咗會，審唔到網絡23條，不過下星期三同之後嘅立法會大會，都有機會審議，所以大家唔好咁快開心住。






http://nextplus.nextmedia.com/news/spot/20151209/313187