曾經參與反國教活動嘅本地樂隊Rubberband，被發現今年7月1日竟然參加了建制派搞嘅《香港巨蛋音樂節》，呢次活動被網民指為「維穩騷」，由蛇齋餅糭升級為請韓星，本地藝人做騷，以圖拉走71遊行嘅年輕人。

有網民已發起杯葛呢次《香港巨蛋音樂節》，更加為Rubberband參與維穩show感到震驚，不過Rubberband似乎接騷時唔得細心，還是迫於換新公司嘅壓力，發現呢個騷嘅真正目的時，已經太遲。鼓手泥鯭似乎好後悔兼自責，由噚晚開始已經不斷喺fb係咁po嘢。

今日半夜佢喺fb就話:「七一維園見！無論如何，一定會join ！」然後再po:「身在曹營心在漢！唯有曹營奏蜀樂！奏完再歸隊！戰友們見諒！」之後再貼banner呼籲樂迷上街，今日更加話:「I feel ashamed and upset for being raped.」

呢次對歌迷同Rubberband來講，真係「to go or not to go, that is the question.」雖然好多人鬧爆，但仍有樂迷都好體諒Rubberband，甚至叫佢哋辭演，但剛簽了新公司，好多事都未必到佢哋控制。

所以都有歌迷提議，叫佢哋上台唱反國教時嘅《睜開眼》，又或者綁黑絲帶，上台唱《年少無知》、血染的風采、自由花(到時佢哋可能係「被辭演」)......不過出席呢個騷，台下面可能成班「愛字頭」叔叔嬸嬸，都係對牛彈琴啦!