大陸有「網絡城牆」，阻止網民上某啲外國網站，雖然網民都有「過牆梯」，識得「翻牆」上網，即係利用VPN連接外國伺服器，嚟避過大陸當局嘅網絡審查，但最近大陸有新措施嚟阻止「翻牆」，隨時連手機號碼都會被停用！



呢個新措施，就係將打擊目標，由VPN服務轉移到直接針對VPN用戶，部份利用VPN「翻牆」上網嘅用戶，會收到通知，話佢哋涉嫌使用違規服務，所以網絡商收到通知，要暫停佢哋嘅手機號碼。

其實除咗呢個新措施之外，大陸當局早喺今年年初，就已經將網絡防火牆「升級」，狂攻各大VPN服務，令到大陸嘅VPN服務變得好唔穩定。似乎就係因為呢個服務好難完全阻止翻牆，所以先出新招。而且暫時未知道呢個行動有幾大規模，亦都唔知被暫停嘅手機號碼，要隔幾耐先可以重新啟動。

一般人收到個咁嘅通知，應該當堂嚇一跳，不過呢啲新措施，就證明咗好多大陸人想翻牆上網。網民想翻牆，隨時都會諗到新方法，禁嚟都冇謂啦。