香港佔領運動之後嘅首個選舉琴晚正式落幕，泛民同唔少傘兵都打住民主旗號出選區會，總算成功將幾位建制大代拉落馬。



要講到最熱烈祝賀嘅，當然係成功爭取將鍾樹根同葛珮帆趕出區議會啦。鍾樹根就喺自己坐咗20年嘅地盤柴灣漁灣區，迎戰獨立候選人徐子見，可能係因為Tree根形象太過深入民心，就連自己英文名都串得錯，今次區選就被徐子見踢走，連自己地頭都補唔住。

至於人人都知佢有博士學位嘅葛珮帆，喺沙田頌安出戰，結果就輸咗俾工黨嘅葉榮，2個建制要員下馬，足以令大家喺fb洗版喇。

至於新民主同盟就認真犀利喇，16位成員出戰區選，15個成功取得區議會席位，得勝率超過9成。

不過，何俊仁同馮檢基就喺今次選戰敗走，何俊仁出戰今次焦點之一嘅屯門樂翠，可惜最終不敵大打明星牌嘅建制何君堯，而馮檢基亦都喺深水埗麗閣不敵陳穎欣。

要講到最唔抵嘅，點可以唔提出戰黃埔東嘅青年新政90後游蕙禎呢？呢位女神BB就講到明要向建制梁美芬挑機。

琴晚就一度傳出，女神BB以300票之差力壓梁美芬當選，不過，喺再點票之後，最終都係以300票之差，由贏變輸，梁美芬繼續壟斷黃埔東。

雖然女神BB游蕙禎今次挑戰建制地盤失敗，不過，佢就話，戰況激烈代表當地市民希望有新改變，對於將來仍然樂觀，當然，大家都希望以後可以再見多佢幾面啦！

仲有呀，提提大家喇，有網民就喺fb發起，今晚8點會喺柴灣漁灣邨tree根個office門口開p慶祝喎，你哋明嫁啦！






http://nextplus.nextmedia.com/news/latest/20151123/303843