依家啲學生好需要與時並進，中學生有通識科，通通都要識；不過如果揭開小學三年班嘅功課，見到問香港房屋供應問題，大家都不必驚訝，一定係為升中鋪路架啫！

開咗學都一段時間，近日網上流傳咗幾張小學三年班嘅常識科功課相，唔好話小朋友，連班政府高官都未必識答。首先就有篇課文總結出本港嘅房屋問題係地少人多，政府應該增建多啲公共房屋，同發展新市鎮。咁就問小朋友，現時本港點解會出現「房屋供不應求」嘅現象，政府可以如何解決。

遙想《壹》仔當年讀小三小四，都係學吓交通工具、花草樹木大自然，依家啲小朋友真係好叻，除咗抄書之外，仲有留意時事，答咗「壓制（抑）樓市」同「善用土地」，港府成日都咁回應，實無死喇，不過呢份功課好似仲未改。

唔緊要，睇埋另一份，問題都係關於土地供應：「香港政府推出了哪些計劃來舒緩市民的居住問題」，呢位小朋友又用政府官員成日講嘅「增加土地供應」、「增加資助房屋」嚟答，唔係掛？老師打咗2個大交叉！有人就話要答計劃名，但課文都無講，會唔會試吓好似今日（10月24日）前財爺梁錦松咁講，最解決土地問題，重點係「唔好做鬥爭」。



http://nextplus.nextmedia.com/news/latest/20151024/286778