今日港台嘅《香港家書》，請來好渴望別人問候自己嘅港大校委盧寵茂，以學長身份寫信問候現任港大學生會會長馮敬恩。

盧醫生喺信入面話覺得佢同馮敬恩有好多相似嘅地方，就同佢分享呢三十年來喺港大作為一個科研人員、一個醫生，同一個老師嘅經驗。佢又話擔心港大百年基業及名聲會受損，指一旦制度崩潰，再經歷另一個一百年都未必能完全修復，強調循序漸進總比革命突變來得好。最後寄語馮敬恩「作為港大學生會主席」，能夠做好榜樣，成為同學嘅模範，「共勉之」。

盧寵茂成篇文章未有開宗明義、言正詞嚴咁狂批馮敬恩（話中有骨呢啲就見仁見智），就咁睇都尚算舒服，不過文章一開首，就話自己喺首次同馮敬恩會見嘅早上七點半，就已經開緊部門會議，不過馮敬恩就回佢話每日冇十點都唔起身。盧寵茂接著話「人的潛能是無限的，只是優先次序的問題，只要你覺得值得做，你一定能做到。」聽落好有道理，但以兩個人嘅起床時間來比較，係咪又可以證明呢一點？係咪一個遲起身嘅人，就註定比早起嘅人差、一個十點先起身嘅人是否註定「你永遠不會成功」？

撇開作息時間呢點唔講，盧寵茂稱馮敬恩為「港大學生會主席」，問題係，馮同學係會長，唔係主席。要尊重人，叫啱人哋個title都係基本嘅一步，對嗎，盧醫生？





http://www.post852.com/暗窒馮敬恩遲起床　盧寵茂連人哋title都叫錯/