聽日就係9.28一周年，佔領運動改寫咗香港嘅歷史，亦改寫咗某啲人嘅諗法，甚至命運，於雨傘運動中走入龍和道跟學生並肩作戰嘅王宗堯，日前於將軍澳接受本報訪問，回首當日，佢表示：「呢件事發生嘅時候，大家好團結好齊心，當然亦有好多分化，但你會見到香港嘅獅子山精神，突然間湧現返出嚟，有啲沉睡緊或向來冇咁關注香港嘅人，都喚醒返佢哋嘅良知，令更多唔同嘅人敢言，發聲表達立場。」

雨傘抗爭一年，最後被政府清場落幕，王宗堯話：「當然你話成個政局有冇變過？我覺得係冇乜變過，可能更令大家覺得氣餒咗，冇咗嗰種一鼓作氣嘅力，亦可能有人因為呢個原因，座大咗自己嘅信心，超然咗自己有嘅權力。」不過佢慶幸目前仍有言論自由：「呢樣暫時係香港好嘅地方，仲可以捍衛，仲可以發聲。」

喺雨傘運動開始時，不少演藝人站出來，可惜最後敵不過封殺令嘅威脅，無奈地選擇收聲甚至轉軚，王宗堯則堅持忠於自己：「我因為同聲同氣畀人叫男神，過去一年多咗關注同工作機會，但我始終覺得自己係香港人，我依然會做一個忠於自己、講事實同企喺啱嗰邊嘅態度，就算重新選擇，我都揀呢條路。」

問到有否試過被人禁聲？佢坦言：「善意有好多，好多關心我嘅人講，難得有機會令人關注你做戲，小心啲唔好過火，唔好扼殺機會；惡意亦都遇過，有人叫我不如離開，但我唔想走，呢個係我嘅屋企，嚟緊會點真係唔知，但我會時時提醒自己，若果你都唔勇敢，就會令大家覺得連嗰點點聲音都冇埋。」












http://hk.apple.nextmedia.com/enews/realtime/20150927/54251746