今日（9月25日）iPhone 6s正式見街啦，當然同樣一早已經有過百個成功預算買機的幸運兒於Apple Store排隊買機。



一踏正八點，Apple Store正式開門，大堆果迷開開心心入鋪買機。開始時好多果迷仲諗住拎到機即刻轉手，至少都可以賺幾千蚊吧。不過同往年唔同，今年警察一早已經做嘢，唔俾收機佬擺檔阻街外，Apple更為了打擊炒風，今次狂推大貨。

不單放鬆限制每一個人可以買兩部6s加兩部6s Plus，合共四部機外，仲要國內Apple網店長開長賣，搞到好多水貨佬都唔敢入貨。

於銅鑼灣希慎Apple Store後門附近零星幾個收機佬敢開價，而且6s細機唔收，就算最受歡迎的玫瑰金6s Plus大機，都只可以賺五六百左右。

唔信邪落旺角先達睇睇，嘩，幾十人堆喺收機鋪頭，個個問完就走。原來回收價只是好過出面少少，但好多鋪同樣只收大機，細機免問。64GB 6s Plus玫瑰金已經最好價，都只是賺最多一千蚊左右。其他顏色如金、銀、黑更乏人問津，絕對鑊味濃。

不過點都好，新機炒唔起，對於一般果迷用家當然是福音，唔洗挨炒價買機。而之前在網上訂機的炒家，未收貨嘅，真是cut單保平安啦。
















http://nextplus.nextmedia.com/news/latest/20150925/269061