世界各地一直提倡餵哺母乳，皆因人奶本身含豐富營養，而餵哺過程中亦可提升母子之間嘅親密感。時下唔少媽咪、名人明星都「返撲歸真」，唔係一味沖奶粉；不過各位媽咪有呢份心，都要有場地配合至得。近日有位媽媽去咗香港君悅酒店（Grand Hyatt Hong Kong），當佢想餵奶時，酒店職員安排佢入一間又細又污糟嘅廁所解決，真係好激氣！

Grand Hyatt喎，話晒都5星級大酒店呀，唔通一間育嬰室都無？上周五（9月18日）有位媽媽喺「母乳媽媽交流」嘅Facebook群組，上載咗喺酒店廁所嘅相，相中可見環境好細，牆身石屎仲要油到出晒界，連廁板都無塊，感覺唔多衛生；好明顯唔係客人用嘅廁所。呢位媽咪事前仲問過酒店有無空房可以用，當時個經理勁快話無房。

事主以及好多媽咪網民都向酒店投訴，更有部分媽咪指早前去其他酒店如Hotel Icon、Banyan Tree，要餵奶時，酒店直頭開埋房，派埋Staff喺門外守住唔俾外人入嚟。相反，唔少網民直斥Grand Hyatt要BB喺廁所開飯。

事後，Grand Hyatt 2度回應。第一次係周六晚11時多，以英文喺事主留言下交代，表示知悉事件，承認有欠妥之處，承諾會考慮更多媽咪嘅需要，下次會提供貴賓室予媽咪餵奶；但未有提及「道歉字眼」。

直至今日（9月21日），Grand Hyatt於Facebook專頁公開致歉，以中、英文再回應事件，為近日不愉快事件，衷心向受影響媽咪同BB道歉，同時，會提醒所有員工提供「提供舒適及私隱空間餵哺母乳」。

其實餵人奶係大勢所趨，唔少商場都新設獨立育嬰室，避免同廁所相鄰；Grand Hyatt咁多人消費，都應該好好改善下喇。















http://nextplus.nextmedia.com/news/latest/20150921/266209