如果有手有腳，唔係人人都想申請綜援，怕被視為社會包袱；哪怕活得再苦，都希望爭取多點尊嚴。近日有位網民「Gladys Chan」，於Facebook分享一張出自82歲伯伯嘅親筆信。

事緣，伯伯當時帶住方包去到快餐店，用店內提供嘅黃糖充饑；被網民見到後，伯伯婉拒對方請食飯，反而寫下一封信，請網民上載，令更多人關注長者生活保障，為綜援正名，令有需要人士可以活得更好。

9月12日晚上，網友喺快餐店見到一位老伯匆匆忙忙以黃糖夾方包，咁就一餐。因為旁邊已經有清潔嬸嬸留意，更準備收番黃糖。伯伯身上著住一件「某某活動工作人員」風褸、腳穿一對女裝水鞋，衣不稱身。

網友見狀頓覺心酸，立即拉住伯伯，想請佢食餐飯。82歲嘅伯伯張彼得婉拒網友，但同對方講到自己一個人生活，每月只係領取2千幾蚊嘅生活津貼，每每交完租後都所剩無幾，唔想無尊嚴地過活而未有申請綜援。

伯伯寫下一封，字體秀麗有勁，思路清晰，以「To whom it may concern」為題，全文如下：

「致香港特區政府有關當局：

前省。
現全民退保（全民退休障）議而未決多時，而綜援一直受人以有對尊嚴欠妥之處。
為對弱勢社群長者有尊嚴地生活起見！
長者綜援應更正命名為「社會保障金」為適合也！

張彼得　八十二歲」

好多網民寄予同情同尊敬，對於香港長者晚年生活，連溫飽都成問題，表示難過；更有人謂：「伯伯寫得一手好字！仲識英文，不該落得此下場」。


















































http://nextplus.nextmedia.com/news/latest/20150920/265595