日前，有女學生孭住古箏搭港鐵，點知喺大圍站就俾港鐵職員截停，話佢個古箏超出標準，唔俾佢搭港鐵而要乘搭其他交通工具；事件引起軒然大波，皆因全港市民均「有目共睹」，水貨客如何利用港鐵載貨而冇被攔阻，但港鐵就堅持喺執行條例時冇雙重標準。

而港鐵條例規定，乘客攜帶嘅物件，長闊高總和唔可以超過170cm，否則就唔俾入閘；不過今日（9月19日），有網民喺「高登討論區」facebook群組度po咗兩張相，留言話，「今日朝早見到個呀（阿）伯係（喺）大圍站被港鐵職員捉左（咗） 可能系（係）因為果（嗰）支管， 之後個呀（阿）伯被迫出翻去自己搭車，咁都得，2支野（嘢）都唔比（俾），你食x啦，你地（哋）港鐵唔係比（俾）運貨咩，咁都唔比（俾）」。

《壹》仔就咁睇，支管嘅長闊高點都唔過170cm喎，唔通係計2支管加埋嘅總長度，唔係咁計呀？《壹》仔真係睇唔透喇。

此外，尋日網上亦瘋傳另一張相，見到有疑似美心職員，將兩大箱月餅搬入港鐵車廂，期間又唔見有港鐵職員阻止喎……呢兩箱嘢，長闊高點睇唔晒170cm啦，吓嘩？！點解又上到車呢？《壹》仔又再一次睇唔透喇。





















http://nextplus.nextmedia.com/news/spot/20150919/265016