由lunch既習慣睇到一個怪異現象，一班收入低於二萬既OL經常食豪lunch，雖然唔係貴到五六百蚊一餐，但係一二百蚊點都走唔甩，同佢地人工唔成正比，之但係佢地又唔會肉赤。"Free on lunch on Friday？"，又見到隔離team既幾個clerk send email 約埋我食lunch，未等我回覆，已經傾緊去新開張既燒牛肉專門店好定係去食閒閒地百幾蚊既全日早餐好。間唔中同佢地食下無所謂，次次唔應約印象都係咁好，睇餐牌個下明知唔夠飽都要就住價錢揀，通常「減肥」、「食清啲」呢啲會搬黎做藉口，直到有次覺得有被搵笨之嫌，從此同佢地出去食就唔會刻意叫個平set lunch刻薄自己。



「阿熊，頭先個餐Jack哥俾晒錢，話每人俾番百二蚊佢得架啦。」小薇行過黎負責向每人收番錢。百二蚊？明明我個餐九十蚊，又無好似佢地咁加廿蚊要杯Mocha，又無收加一，點解我要俾多三十蚊？點計都唔岩數！「咦，小薇，我個set應該係九十蚊咋……」「下，我唔知啊，我見到張單總數，咪平均除番開人頭，大家都係食差唔多既野，唔差得個少少錢啦！」咁同明搶有分別嗎？Fine，我以後識點做啦，你地加錢要啲咩，我跟！仲有，太貴既我會say no，又唔係有特別事慶祝，真係唔捨得無端端要係荷包拎咁多錢出黎。我認自己窮，無資格咁任性去享用貴lunch，仲要背脊骨落，唔扺！



我呢隻慳家熊總覺得同佢地有啲距離，結左婚既，就講自己收工有老公揸車接送，唔洗煮飯餐餐外賣，想keep fit咪落會所做下gym，做夠咪返上樓浸住浴敷mask，再攤係按摩椅梳乎下就準備訓覺。平時同老公一星期食一次buffet一次high tea，層樓係老爺奶奶既，無經濟負擔，過住搵錢買花帶既偽闊太生活。而單身既，開口閉口都講夢想既男神條件，要有古天樂既面孔，周杰倫既才華同埋劉德華既性格。除左高富帥，又要照顧周到，及時了解到自己需要，懂得幽默情趣，真係邊到搵啊？我同男友對食唔係無要求，放假食lunch睇岩餐牌價錢就會試下，或者煮下飯仔，比起要專登俾人知食貴價高級餐有情趣得多！



間唔中俾阿頭「訓示」完，我都會同friend底既同事去食番餐好既，六七十蚊個lunch對我黎講係高消費，有時食米線加多兩個餸已經當係食好左架啦！其實又有咩所謂，最緊要身邊既同事岩key有話題，出黎吐下苦水鬆一鬆比起食啲咩更加開心！如果同行既係偽闊太同埋單身貴族既話，要被迫聽佢地講老公有幾寵壞佢地，又或者好似怨婦咁問點解係公司識唔到好仔……唔係講錢就係男人。就算想關埋對耳仔等食，精緻既菜式一到又要等佢地自拍放上面書後，先可以享用貴夾唔飽既lunch……自己肚皮好現實，食唔夠做野就無黎精神，搵到錢黎至在食，我就情願簡單啲，social飯可避則避，他他條條咁係工作時間入面享受僅餘一小時既快樂。


http://www.vjmedia.com.hk/articles/2015/09/10/115605

其實咁樣唔算最差架喇，呢D你都重可以揀去唔去
但PM果行重仆街，高層升職離職，細既夾錢請食飯
唔好彩既跟到D男人高層鍾意劈酒，每個禮拜都要去一次，傷肝又傷錢