民建聯陳鑑林和葛珮帆早前分別自行抽驗牛頭角下邨和馬鞍山欣安邨的食水，聲稱所有樣本含鉛量無超標，陳更聲言居民可「安心」，又指樣本數量較其他政黨多，更加準確，惟政府其後驗出兩邨均有樣本超標。民建聯蔣麗芸今日在立法會內會上，稱坊間有很多機構驗水，「我哋民建聯都驗咗幾十條邨啦，連埋私人邨成一百條邨添啦，已經驗哂啦」，質疑政府應盡快為更多住宅抽驗。不過，政務司司長林鄭月娥回應指，根據資料，目前坊間只有8間化驗所才有能力驗鉛水，「我必須要呼籲你應該要搵啲合資格嘅化驗所先可以驗」。

蔣麗芸稱自己「成日都支持政府，唔好畀佢哋咁大壓力，添煩添亂」，但認同黃毓民所言，認為政府在今次鉛水風波「有啲」進退失據，「有時你都要認㗎，唔可能嚟到今時今日，我哋啱哂，乜都啱哂……如果係咁，可能啲官員都患咗官場麻痺症」，質疑政府未有盡快為更多居民驗水驗血「做得唔漂亮」，「你幾多個大學、幾個機構都可以驗水，成本又低，我而家攞去畀人哋，同人講吓價，百幾蚊可以驗一支水啦」。

林鄭月娥則指，完全無需要為已驗出有樣本超標的屋邨再全邨驗水，並舉例指若政府當初為啟晴邨所有居民（5,204戶）驗水，以目前僅化驗3,400個樣本計，「今日仲係驗緊啟晴邨，不但唔可以處理其他公共屋邨，更談不上為幼稚園驗水」。















http://hk.apple.nextmedia.com/realtime/news/20150901/54155594