港視主席王維基，尋晚（8月17日）出席《三面形醫》大結局優先場，有觀眾向佢大叫「加油」，維基好感慨咁話：「有時，有啲嘢唔係加油就得。」



的而且確，港視大部分作品揼本又認真，但劇集叫好又點丫？喺發牌始終無期嘅情況下，港視播埋《夜班》就宣告冇貨，打敗仗，主席王維基想唔灰都唔得。

唔拍劇都係意料中事，之前見佢轉攻網購，使3,000萬喺51個地鐵站落廣告、親自送貨製造噱頭，HKTV已經正式變HKTV MALL，搞網購絕地反擊之餘，亦意味著，聽晚首播嘅《夜班》會喺「港視」告別作。

《夜班》以幾位EU衝鋒隊隊員做主幹，貫穿唔同夜班工作嘅人與事，亦因為以「黑夜」為題，劇組用上電影級嘅攝影燈光，齋睇畫面已令人期待。卡士方面又係港視常用班底，林文龍、林嘉華、郭鋒，雖然都係撞口撞面，起碼唔使日日愛回家。

播完《夜班》，港視得番外購劇，雖然維基講到又灰又眼濕濕咁，但魔童又點會甘心齋搞網購，佢話：「香港係需要有自己嘅嘢，唔拍電視劇，唔代表我唔拍電影，我用4億喺將軍澳起廠房，唔能夠用嚟做物流，係要用嚟拍嘢嘅。希望大家繼續支持港視。」由港劇到網購，兜兜轉轉去到拍電影，希望維基今次真係掂！
http://nextplus.nextmedia.com/news/ent/20150818/247600