九品芝麻官入面，周星馳飾演嘅包龍星係一條廢柴小官，樣衰市井口臭低俗又貪小便宜，佢一句：「包龍星條仆街跌咗入個井度呀！！」啲街坊掟嘅臭雞蛋蕃茄爛菜係可以即刻填滿成個井。

但係佢去到大是大非面前，亦即係戚秦氏張敏被人輪完大米，然後仲要被「三權合作」咁樣砌鳩返佢轉頭，佢亦終於都忍唔住同黃一飛講：「大人....我都知縱橫官場不外乎都係靠一個屈字，但係呢鑊你未免真係屈得太勁喇！」

戚秦氏雖然倒楣，但臨尾總算好彩，因為佢有一個雖然樣衰衰格衰衰嘅包龍星肯幫佢，而包龍星亦有一個雖然鐘意去妓院但依然有一絲絲良知嘅細龜皇帝幫拖。

係無錯，香港地，我哋可能每個人都有自己嘅問題，有人會粗口爛舌食煙飲酒，有人會孤寒度縮成日搵人笨柒，有人會跟紅頂白勢利現實，有人會鐘意暗簡去一樓一撳鐘仔搵姐姐，BlaBlaBlaBlaBla.....

但我絕對相信無論點都好，一個堂堂六尺男兒無論再仆街，都唔會講得出「條女用對波撞我吖嘛。哦？點解反而條女會成面都係血而我又無事？佢自己搵隻手卒個鼻咪之嘛，咪卒到一面都係血囉。」

而且，跟住仲要成班「手足」一齊笑，一齊歡呼，覺得自己贏咗。

而同時間，佢哋嘅「手足」朱經偉警棍連環扑路人仲竟然可以痴撚線咁講係「手臂嘅延伸」，仲有好多、好多、好多，佢咃又反而可以係繼續一副「球證旁證足總足協全部自己人你吹得我漲咩」嘅格咁死撐到底。

一絲絲嘅良知並唔代表我哋一定都係好完美，而係即使我哋本身有再多嘅問題、再柒、再仆街冚家產都好，起碼，有啲事我哋係做唔出。

而佢哋，一班被市民、納稅人授予公權力，自稱中立、專業、不偏頗不徇私，理應係比一般市民有更高品格嘅嘅所謂「公僕」，唔止做得出，做完，仲會笑、仲會歡呼喝彩。

我好心寒。


https://www.youtube.com/watch?v=y-7dAgTNiM8


https://www.facebook.com/justwritingsomething/photos/a.368734843145812.95981.366136320072331/1054530831232873/?type=1