抽水呢家嘢真係抽極都唔會完，前晚（7月28日）港大校務委員會完結後，數十名學生衝入會議室抗議，而校委盧寵茂喺混亂中突然自行倒地數分鐘，仲要緊抱右膝，搞到全民連日嚟都瘋狂洗版改圖，惡搞盧寵茂嘅世界級插水技能。
好似何韻詩、黃秋生、張敬軒等藝人都圖文並茂，明嘲暗諷當事人；尋晚（7月29日）狄易達都跳住舞抽埋一份。

尋日大約8點幾，狄易達喺Facebook上載咗張單人街頭跳Breaking，單手撐地，另一隻手捉腳嘅Pose，動作似足盧寵茂，連狄易達都話估唔到呢個「捉膝」動作會咁hit。

2小時後，狄易達又上載多張相，今次再勁啲，連埋佢共6個人，以頭頂著地，凌空挺起個人兼拗腰，令人又諗起盧寵茂。而狄易達都為張相加咗啲搞笑Hashtag，分別係「抽水舞極限」同「‎至強茂步」，真係Moon Walk都要行埋一邊呀！

不過呢，狄易達facebook上得返張多人相，單人照就無咗影；點睇都唔似美麗華旅遊刪相咁「笠水」喇！
http://nextplus.nextmedia.com/news/latest/20150730/236932