八方有朋友噚日路過喺沙田排頭村嘅沙田鄉事委員會會址，發現頂樓有啲嘢好搶眼，原來係一張寫住「『三無』港鐵」嘅Banner，針對港鐵喺大圍起咗屏風樓「名城」，影響大圍區嘅電視接收卻濶佬懶理，一味拖字訣，大鬧港鐵「無恥、無良、無賴」。

嘩，咩事鬧得咁狠呀？八方問過沙田鄉委會主席莫錦貴，佢證實係沙田鄉委會掛呢條Banner，因為佢哋N度向港鐵反映，唔該搞好返電視接收問題，例如幫受影響居民裝訊號轉發器，但對方軟皮蛇咁唔理，就算沙田民政事務處開埋聲都冇用喎，咪掛Banner抗議，唔排除去港鐵站示威添，聲言會同港鐵開戰。

港鐵發言人回應，2010年底獲悉大圍村同大圍新村嘅電視訊號接收問題，據通訊辦進行嘅模擬測試，只有大圍新村嘅電視訊號喺名城落成後有所減弱，港鐵話曾向沙田鄉委會及村代表建議喺大圍新村每戶安裝放大器改善接收情況，但村民唔接受。

而通訊辦則發現喺名城天台加裝轉發器，可以改善大圍新村嘅電視接收，但港鐵2013年起屢次向名城業委會提出申請但被否決。通訊辦最新測試結果則顯示，喺美田邨安裝轉發器可以改善情況，港鐵已承諾負責相關安裝、保養及維修費用，希望盡快落實安裝工程。唔知沙田鄉委會收唔收貨？
http://hk.apple.nextmedia.com/realtime/news/20150729/54028397