明年舉行嘅立法會選舉，邊一區選情最好睇？新界東可能都係熱選，事關向來吸票力不俗嘅鄭家富，原來都考慮緊喺新東復出，若然阿富加入戰團，相信上屆獲佢支持過票並以尾席當選嘅新民主同盟范國威形勢最危。

八方問過鄭家富，佢證實考慮復出，呢個想法喺佔領運動結束後浮現，觸動點係佔領其間，見到香港老中青都對未來有希望，人人都喺唔同崗位付出，覺得自己喺爭取民主、改善民生上仲有心有力。但佢話仲要同太太商量，指08年唔爭冧莊好大原因係想多啲時間陪有腦瘤嘅太太，太太病情近年已穩定，「好支持我爭取民主同喺議會工作」。

外界相信如果佢東山再起，咖喱范最受影響，阿富話已經同對方提過復出嘅意願，又話對對方當年參選，雖則唔少樁腳都係來自佢嘅班底，但其實大家有心有力一齊做都好吖。

歡唔歡迎阿富一齊落場競爭？咖喱范話選舉係自由嘅，如果阿富上場，競爭一定好熱烈，佢話自己最重要做好基本功，尤其要履行選舉承諾，仲特別提及，唔好忘記新東泛民支持者，喺歷屆立法會選舉都好識配票喎。
http://hk.apple.nextmedia.com/realtime/news/20150724/54012992