護級失敗嘅地區球會和富大埔，按例新球季就要降班，點知獲新贊助商支持繼續出戰港超聯，加上足總亦希望聯賽有10隊角逐。

既然「神女有心，襄王有夢」，大埔秘書長陳平話會回覆足總，願意接受挽留，只要大埔區議會下月初開會通過就可拍板參賽。

陳平話，新贊助商表明想踢港超聯，加上港甲冠軍駿其天旭放棄升班，足總好想新季有10隊角逐，而球會考慮過多個因素後就同足總講願意留級，具體班費同方針要等定晒啲嘢先公佈。

其實足總挽留降班隊都唔係第一次，上次就喺2006年球季挽留尾二、按例要降班嘅南華，結果當然成功，而南華仲再獲羅傑承擔任足主而大搞。

大埔球迷曾在比賽中掛出橫額揶揄「少林寺」，陳平則稱：「我們完全明白遊戲規則 ，球隊本已準備好在甲組作賽，不過足總盛意拳拳邀請我們留級，而我們亦非主動申請留班，絕對是隨着固有機制行事。」

陳平仲話，下季有比較充裕班費去組軍，正着手搵緊啲有大埔背景球員加盟，希望球會睇上去有多啲地區特色，亦會強化球會青訓。