神劇《大時代》在深宵重播引起觀眾捱眼瞓煲劇潮，除了劉松仁、鄭少秋、江毅、曾江等老戲骨高手過招令觀眾拍案叫絕，劇中女神藍潔瑛、周慧敏、李麗珍個個有美貌有演技，其中扮演慳妹的Vivian更深入民心，23年後的今日仍有人叫她做慳妹，昨日Vivian現身將軍澳接受本報專訪，細訴當年扮演慳妹的點滴。

Vivian的慳妹角色成經典，她謙虛說：「我唔敢講係咪代表作，但喺我演戲生涯上好多人記起我演呢個角色。23年喇，成日有人同我講呢個劇，甚至乎叫我做慳妹，真係令人好深印象角色，慳妹喺我心入面唔可以磨滅。拍時已知觀眾會鍾意，因為劇本太強，歸功靈魂韋家輝先生，所以佢邀請我參與，我覺得係一個榮幸。」

據知慳妹角色取材自《大時代》一位女編劇，問Vivian是否真有其事？她說：「有少少印象，但好模糊，懷疑最初同韋家輝傾時，佢有提過呢樣嘢，其實《大時代》係咪佢故事？哈哈，佢係咪方展博？」為何韋家輝找她演慳妹？Vivian說：「到依家都係一個謎，嗰時入電視城係傾另一個青春劇，我早到咗，經理人話有另一套劇都想同我傾，角色都啱我演，原來係見韋家輝，自己成日諗，佢會唔會見到我路過，覺得我好適合做呢個角色？」

現實中的Vivian是否慳妹？她笑說：「係一個美麗誤會，我點可能係慳妹，慳妹真係慳到over咗，刻薄自己，病態嘅慳，我諗我係中間嘅慳，唔係大花筒，但又唔係精打細算嘅人，對金錢比較冷感，我諗大家睇得投入，我又演得投入，大家覺得慳妹就係我。」

劇中方展博揀了慳妹，但現實中劉青雲卻選擇了郭藹明，假設Vivian是方展博，最愛會是誰呢？她想了一想說：「我兩個都唔會揀，因為呢兩個女人都義無反顧咁愛佢，如果我揀咗其中一個，會傷咗另一個心。」

雖然慳妹和方展博愛得刻骨銘心，但最後慳妹卻死了，她直言：「我覺得佢應該死，咁唔錫自己，食嘢唔健康又有病，慳妹離開咗，感情有遺憾，更加容易打動觀眾感情。」慳妹死了，方展博是否應返回龍紀文身邊？Vivian說：「應該喎，慳妹都死咗，方展博同龍紀文一齊係最好結局。」

《大時代》幕幕經典，Vivian最難忘哪場戲？她說：「大家焦點會喺最尾嗰場戲，2015年仲有人問我『紅絲巾飛走，慳妹瞓喺阿博懷裏係咪代表死咗？』至於最打動我一幕，係喺公園同方展博摺紙飛機放，場面好震撼，記得25周年演唱會請青雲做嘉賓，當時請佢嚟喺我個騷放紙飛機，好感動。」


http://s.nextmedia.com/realtime/a.php?i=20150424&s=7018882&a=53666519