【又要請張家輝出動】「嘟」你個街…ThisAV？ThisATV嚟㗎！
http://hk.apple.nextmedia.com/enews/realtime/20150319/53547399


ThisATV，同ATV一樣，都係冇廣告。

ThisAV，對高登仔嚟講，係一個有骨氣嘅色情網站。928警施放催淚彈驅散佔領政總表達訴求嘅市民，ThisAV個logo，之後都改咗黑色同掛黃絲帶；2012年佢哋都以黃絲帶聲援反國教學生。喺好多人對政府用催淚彈對付學生都冇反應之下，鹹網，實在比佢哋更有社會良心。

義氣仔女網站有ThisAV，萬料不到，依家竟然有人整咗個魚目混珠嘅網站——ThisATV！賣點係「亞洲唯一收視只有個位網站」( http://thisatv.com/ )呢個「ThisATV」網站應該唔會啱鹹濕仔睇，裡面冇丁圖亦冇人體「解剖」影像睇，但就有《ATV這一家》、《我愛下午茶》、《把酒當歌》、《李居明妙論天下》等等。熟口熟咁似亞視？因為真係亞視嚟0架嘛！

呢個ThisATV網站當然唔係官網，係一啲別有用心或者口味獨特嘅網民自己整嘅，啲片都係link YouTube片，慳水慳力。網站內容設有分類，如教育、娛樂、運動、新聞與政治等等，好豐富喎，但節目都係不離《足球狂熱》、《打吡睇真 D》、《ATV這一家》、《我愛下午茶》、《把酒當歌》、《李居明妙論天下》、《我們這一班》、《國際財經視野》等等。望下個preview列表，死囉，原來ATV依家所有節目，大部份都係兩個人(或以上)坐喺佈景板前講嘢，電視台變成「講台」。

或者ThisATV都想擺番啲經典劇嘅，但蕭若元時代嗰啲《大地恩情》、《大內群英》系列、《大丈夫》、《鱷魚淚》、《天蠶變》等等，以賤價賣咗俾蕭定一，蕭若元仲話如YouTube有片即會投訴要求落架；至於粵語長片，又以700萬賣咗俾大台，咁，試問ThisATV仲可以播乜嘢呢？

同埋，呢個ThisATV網站同ThisAV一樣，都歡迎大家落廣告，而且ThisATV嘅廣告位擺喺主頁上方，一開就見到，可惜佢同ATV一樣，都係冇廣告。

More，ThisATV呢個網站，load得好慢。本來夜闌人靜瞓唔著諗住click入去睇片催眠，點知loading嗰陣分分鐘已經等到瞓著咗lol



主頁。好多好多節目，但一個廣告都冇。


YouTube片，搞掂。


很想要嗎？


幾「多」分類…


又係嗰句啦…


呢個係ThisAV。原來係藍絲？2014年前《明報》總編輯劉進圖遇襲，新聞界發起反暴力遊行等社會運動，ThisAV繫上象徵新聞自由嘅藍絲以示支持。


佔領運動。




學民思潮絕食抗議推行國民教育課程期間，ThisAV於2012年9月1日暫停開放一天，聲援學生。